Prome Minister na side event "Threats and Opportunities of Digital Technologies: Women in the Public Eye”
ORANJESTAD - Prome Minister Evelyn Wever-Croes ta na Nacionnan Uni na New York pa atende e conferencia di “Commission on the Status of Women” (CSW69), unda lidernan di mundo ta enfoca riba kico cada pais a haci y ta haciendo pa mehora e posicion di mucha muhe y hende muhe.
Diamars 10 di maart, Prome Minister a atende un side-event di CSW69, “Threats and Opportunities of Digital Technologies: Women in the public eye”, organisa pa Council of Europe y Yuricko Backes, Minister di Defensa y Igualdad di Luxemburg.
Durante e evento aki Prome Minister di Aruba a comparti su experiencia como un hende muhe den wowo publico y e menasanan y oportunidadnan di tecnologia digital.
Segun Prome Minister, bida publico no ta solamente servicio pero ta resiliencia. Tur dia un hende muhe den liderazgo ta enfrenta abuso online, desinformacion y control cual ta cosnan cu ta afecta un hende muhe den gran forma, simplemente pa motibo di nan sexo. Esaki no ta solamente un reto personal pero ta un menasa pa democracia ora cu ta obliga hende muhe pa keda keto.
Na Aruba, e uzo di media social ta mas halto den region. Segun e estudio Diagnostics on the Technology Divide on Aruba (2022) di Futura, mas di 90% di e poblacion ta envolvi activamente cu plataformanan digital. E conectividad aki ta duna oportunidad increibel pa participacion civico, pero tambe ta expone personahenan publico, specialmente hende muhe, na riesgo di acoso, desinformacion y abuso online.
Mester sigura cu tecnologia digital no ta un barera, sino un brug, un herment pa empoderamento, inclusion y igualdad. Nos mester fortalece leynan y tuma responsabilidad pa protege bos di hende muhe, tanto online como offline. Aruba ta solidario cu esfuersonan global pa combati violencia facilita pa tecnologia.
Nos ta kere den un mundo digital unda hende muhe por lidera, expresa y contesta sin miedo y hunto nos mester exigi plataformanan cu ta sigur, miho strategianan, y e compromiso global pa proteha hende muhe den liderazgo. Mester sigui e combersacion aki, cu bos firme y yen di curashi.