Prome minister di Aruba lo asumi e cartera di enseñansa y deporte banda di su cartera existente
ORANJESTAD – Dialuna mainta 21 di october durante conferencia di prensa di Gobierno di Aruba, Prome Minister Evelyn Wever-Croes a elabora riba e cartera di Deporte y Enseñansa.
Prome Minister ta splica cu despues cu Minister di Enseñansa y Deporte, señor Endy Croes a entrega su retiro riba 16 di october 2024, e proceso a encamina y Gobernador di Aruba S.E. Alfonso Boekhoudt riba 18 di october 2024 a duna sr. Endy Croes su retiro di como minister.
Gobierno a reuni den nan seno y yega na e decision cu Prome Minister di Aruba lo asumi e cartera di Enseñansa y Deporte banda di su cartera existente como Minister di Asunto General, Innovacion, Organisacion Gubernamental, Infrastructura y Planificacion Teritorial pa e periodo demisionario di Gabinete Wever-Croes y lo continua cu e cartera di ex-Minister Endy Croes pa asuntonan coriente.
Prome Minister a splica cu lo pone enfasis pa trece trankilidad bek den enseñansa y den deporte y sigui enfoca riba e reformanan y e cambionan andando. Tambe lo sigui duna atencion na esnan envolvi den e cambionan entre otro docentenan y alumnonan.