Prome Minister a reuni cu Minister di Asuntonan di Exterior na Hulanda
ORANJESTAD - Recientemente, Prome Minister demisionario Evelyn Wever-Croes, a biaha pa Hulanda y a reuni cu Minister di Asuntonan di Exterior Caspar Veldkamp.
Dos tema di importancia cu a cubri durante di e reunion aki tabata e situacion actual na Venezuela y e posicion di e gobierno nobo Mericano.
𝗧𝗲𝗺𝗮: 𝗩𝗲𝗻𝗲𝘇𝘂𝗲𝗹𝗮
Prome Minister a indica cu e situacion na Venezuela tin Gobierno di Aruba preocupa. Ta importante pa compronde kico e efecto di e desaroyonan interno y e situacion di derecho humano na Venezuela, tin riba Aruba. Ademas Aruba kier sa e posicion di Union Europeo riba Venezuela ya cu nan no ta reconoce Presidente Maduro como e presidente ganado pa cual motibo no a atende e inauguracion tampoco. Prome Minister a splica Minister Veldkamp e motibo pa kico ta importante pa Aruba tin claridad riba e topico di Venezuela. Venezuela ta hopi cerca di Aruba y tin hopi hende cu tin laso familiar, economico y cultural cu e pais.
𝗧𝗲𝗺𝗮: 𝗚𝗼𝗯𝗶𝗲𝗿𝗻𝗼 𝗻𝗼𝗯𝗼 𝗻𝗮 𝗠𝗲𝗿𝗰𝗮
Un tema cu Prome Minister a trata durante varios reunion na Den Haag, ta e posicion di e gobierno nobo Mericano pa loke ta trata e maneho migratorio. President Trump a declara cu e lo hiba un maneho migratorio hopi mas estricto, y p'esey ta importante pa Gobierno di Aruba ta altura di e maneho aki, ya cu cualkier decision na Merca por tin su efectonan entre otro pa nos pilar economico principal cu ta nos turismo cual mayoria ta bin di Merca.
Aki a intercambia ideanan y papia di diferente scenario pa asina ta miho prepara den caso di cualkier eventualidad. Pa loke ta e decision di Merca pa hisa tarifanan di importacion, esaki sigur lo tin un efecto riba costo di bida na Aruba, mirando cu productonan lo bira mas caro. Apesar cu esaki no tin efecto riba Aruba na e momentonan aki, ta importante pa tin algun scenario prepara pa mitiga e efectonan unabes cu esakinan cuminsa presenta na Aruba.
Minister Veldkamp a tuma e oportunidad, pa gradici Prome Minister pa representa Reino Hulandes den varios ocasion, manera entre otro na Nacionnan Uni, y na diferente toma di presidencia den e region.
Prome Minister a gradici Minister Veldkamp pa e oportunidad di por a reuni cu su persona, y a enfatisa riba e importancia pa semper tin un bon cooperacion y relacion entre Aruba y Gobierno Hulandes.