Programa nacional pa muchanan spaar
ORANJESTAD - Como parti di e ehecucion di e ‘National Children Savings Program’ lo inicia e siman aki cu e parti di e conscientisacion di e importancia di spaar cerca nos muchanan y hobennan for di un edad jong y riba e rol di e contexto familiar den esaki.
Desde comienso di 2024, gobierno a aproba e ‘National Children Savings Program’, cual programa nacional pa nos muchanan spaar ta den ehecucion.
Educacion financiero ta un componente clave di maneho di Ministerio di Asuntonan Economico, Comunicacion y Desaroyo Sostenibel pa un economia inclusivo y duradero. Desde 2022 ta ofrece gratis e programa riba educacion financiero ‘Finansas den Mi Hogar’ den tur districto cu e meta pa duna guia y conocemento cu por yuda hogarnan tuma decisionan financiero na bienestar di cada uno.
Pa stimula spaar na un edad jong y asina logra pa futuro un generacion cu ta spaar, a desaroya e “National Children Savings Program”. Meta di e programa nacional pa muchanan spaar ta cu cada mucha tin un cuenta bancario pa spaar y cu gobierno bincu accionnan concreto hunto cu sector priva pa stimula cu e muchanan ta spaar.
E motibo y manera pa spaar ta un componente esencial di e programa educacion financiero. Sondeo di Banco Central di Aruba ta mustra cu aunke casi 60 porciento di hogarnan cu a participa na e encuesta riba nan bienestar financiero ta indica di tin un cuenta pa spaar, solamente 1 den cada 3 hogar berdaderamente ta spaar riba un base regular.
