Programa di incorporacion

Programa di incorporacion pa enseñansa basico

E programa di incorporacion ta un proyecto di Departamento di Enseñansa y ta cay bou di Directiva di Scol Publico. Pa casi diescuatro aña ta existi na cinco scol basico publico un programa special pa guia e muchanan cu un otro idioma di cas, e asina yama PRISMA-project. Desde 2001 e programa aki ta existi na algun Dependance. Na principio e meta di e proyecto di Prisma tabata solamente pa yuda e muchanan cu tin otro idioma na cas cu no ta Papiamento of Hulandes, pa nan por domina den un tempo relativamente cortico e idioma Hulandes.

Na 2001 a scoge pa e Dependancenan ora cu a descubri cu tin hopi mucha stranhero bibando na Aruba y cu no ta bay scol. Desde e momento ey e fluho di mucha stranhero pa Aruba a aumenta bastante. A scoge pa guia nan den e Dependancenan p’asina no pone un peso extra ariba e scolnan regular y e maestronan na e scolnan aki. Di e forma aki e maestronan por a duna mas atencion na e muchanan naci na Aruba. Pero den transcurso di añanan mas y mas mucha Arubiano a haya ayudo extra den e idioma Hulandes pa medio di e metodo di Prisma. Hulandes ta y lo keda pa e muchanan Arubiano un idioma stranhero y lo no bira nunca nan prome idioma di cas of lenga materno.

Ehecucion

Tin dos manera pa core e programa:

  1. Na e scolnan basico publico ta saca alumno pa Prisma for di klas ora di les di Hulandes y di lesamento. Durante nobenta minuut nan ta haya les di Hulandes y lesamento segun metodo di Prisma den un local apart. Despues nan ta bay nan klas bek y ta sigui atende otro lesnan cu nan compañenan di klas. Si resulta necesario, nan ta sigui cu “Taal en Lezen” segun e programa di Prisma te ora cu nan no tin mester di ayudo adicional mas. E scolnan publico ta traha cu rooster semanal segun edad. E grandura di e grupo segun edad por varia pa cada “blokuur”;
  2. Dependance ta e scolnan apart na unda gran parti di e muchanan stranhero entre 8 y 13 aña ta reparti den grupo fiho di maximalmente 15 alumno pa klas. E klasnan ta reparti segun edad. Durante henter un aña escolar e alumnonan ta den un Prisma-klas. Durante henter aña ey nan ta haya solamente idioma Hulandes y lesamento segun metodo di Prisma. Fuera di esey nan ta haya tambe e mesun metodo di Rekenen igual na e otro scolnan basico. Despues di un aña nan ta pasa pa un scol basico of scol avansa igual cu e muchanan di Aruba.

Programa di incorporacion pa studiantenan secundario

Desde 2002 ta acepta e hobennan entre 14 y 18 aña cu un idioma stranhero apart na un Dependance. Cu ayudo di un programa special nan ta haya preparacion durante un aña escolar pa despues nan pasa over pa enseñansa avansa. Esaki por ta MAVO den dia, scol anochi of EPB. Ta reparti e alumnonan aki tambe den grupo di 15 pa klas.

Inscripcion

Inscripcion pa e cinco scolnan publico basico ta tuma luga personalmente cerca cabesante di e scolnan concerni. Pa e dos dependence ta haci e inscripcion personalmente na Departamento di Enseñansa cerca e coordinador señora Marva Groeneveldt of na Fundacion pa Scolnan Catolico (SKOA) na Copernicusstraat 11.

Inscripcion pa e Dependance pa e muchanan stranhero mester tuma luga semper y prome na Departamento di Enseñansa cerca e coordinador di e programa di incorporacion y despues na e Dependance mes na Brazil.

Documento

E documentonan cu mester trece ora di inscribi un mucha cu no ta Arubiano:

  • Permiso balido di estadia di un di e mayornan;
  • Identificacion balido di e mesun mayor (cedula of paspoort);
  • Permiso balido di estadia di e mucha;
  • Identificacion balido di e mucha;
  • Carnet di AZV di e mucha of un prueba balido di seguro medico di un compañia priva;
  • Pasfoto recien (solamente pa scol avansa).

Di tur e documentonan menciona lo saca copia y warda nan den un archivo.

Gasto

Pa e scolnan publico e suma di inscripcion ta 75 florin pa cada aña escolar. Pa e Dependancenan e placa pa scol (schoolgeld) tambe ta 75 florin pa cada aña escolar. Pa e Dependance di scolnan avansa, e placa pa scol ta 125 florin pa aña. Fuera di esey cada alumno ta paga mas o menos 25 florin como contribucion pa un seguro colectivo pa accidente. Ademas e mayornan mes mester cumpra e otro articulonan pa scol manera uniform, agenda y pa esnan cu ta papia otro idioma cu no ta Hulandes of Papiamento, por cumpra diccionario den combinacion cu e lenga materno y Hulandes.

Localidad

Pa scol basico
Colegio Conrado Coronel                                  Morgenster 56-D, Seroe Blanco
Colegio Hilario Angela                                        Weg Fontein z/n, San Nicolas
Comm. Pieter Boer Basisschool                      Trinitariastraat z/n, San Nicolas
Reina Beatriz Basisschool                                 George Madurostraat z/n, Oranjestad
Washington Basisschool                                   Washington z/n, Noord
Dependance Fatima College                            Wilhelminastraat z/n, Oranjestad
Dependance St. Michaelschool                        Brazil z/n, Brazil


Pa scol secundario
Ex Prins Bernhardschool                                   Brazil 44-A, Brazil 

Pa mas informacion por tuma contacto cu e Coordinador di e programa di Incorporacion.