Procedemento hudicial asunto di LAR
Tur ciudadano of compania cu no ta di acuerdo cu un decision cu gobierno a tuma, tin e derecho di haci obhecion. Sinembargo no ta tur decision di gobierno ta cay bou di e asina yama LAR (‘Landsverordening administratieve rechtspraak’), pero solamente desicionnan tuma door di instancianan adminatrativo di gobierno (‘beschikkingen’) cu ta concerni un ciudadano of compania specifico. Pues ta decisionnan cu gobierno a tuma den caso individual (por ehempel rechaso di un peticion pa estadia of un peticion pa bijstand).
No por entrega obhecion contra un regla cu ta conta pa tur, pues un regla general. Tampoco no por haci obhecion, basa riba LAR, contra decision tuma den asunto di belasting of den asunto cu ta concerni empleado publico como trahado di gobierno.
Ademas mester ta trata di un decision negativo por escrito y solamente interesado por entrega un carta di obhecion. Interesado ta e persona cu a pidi gobierno pa tuma un decision.
Tambe ta considera esun cu directamente ta envolvi den e decision riba e peticion di un otro como interesado. Aparte di esey, un persona ta interesado si gobierno pa su mesun cuenta ta tuma un decision cu ta perhudica e persona.