E meta di e revista “E cosecha di Juancho” ta pa informa y educa nos muchanan riba e historia di San Juan. Den e revista ta haya informacion di e origen di Dia di San Juan y con nos ta celebr’e, e nificacion di bistimento di color geel y cora, e candela, musica y baile, nificacion di e gay y contamento di storia di antes durante San Juan.

Ademas tin wega pa mucha, pintura y concurso cu e muchanan por participa pa gana premio. Lo reparti e revista aki na 14 mil mucha na diferente skol.

UNOCA lo presenta un serie di video educativo di Dia di San Juan riba nan plataforma social y canalnan di television. Comision Celebracion Dianan Nacional, lo ta encarga pa promove tur evento di San Juan, y tur instancia/organisacion tin oportunidad te cu 19 juni pa informa CCDN via ccdn@cultura.aw di nan evento pa publica esaki den e calendario di evento.

Eventonan registra pa Dia di San Juan – Dera Gay 2023 te na e momentonan aki:

• Centro di bario Playa Pabou;
• Centro di bario Noord;
• Centro di bario Savaneta;
• Fundacion Chico Harms na Centro di bario Brazil;
• Instituto Kateketiko Diosesano Aruba;
• Club Sport Boys;
• Jong San Nicolas.

Gobierno ta gradici Archivo Nacional Aruba, UNOCA, Departamento di Cultura, Comision Celebracion Dianan Nacional pa nan cooperacion y tambe tur organisacion cu ta organisando evento pa Aruba por celebra Dia di San Juan – Dera Gay. Ademas ta invita henter comunidad pa asisti na e celebracionnan di Dia di San Juan -Dera Gay den bario y biba nos cultura.