Presentacion Proyecto Gateway 2030

E terminal aki ta forma parti integral di e ambicioso proyecto Gateway 2030, cual Gabinete Eman II a anuncia na mei 2017, den anticipando e crecemento continuo di turismo. 
Ta un gran satisfaccion pa e mandatarionan haya un bista directo riba e avance di e proyecto, particularmente cu e culminacion exitoso di Fase 1A. Segun Prome Minister Eman, esaki ta un paso firme pa mehora e infrastructura aereo di Aruba, optimalisa e experiencia di e pasahero, y na mesun tempo, promove crecemento economico y fortalece posicion di Aruba como un lider regional den aviacion.

Durante e presentacion, ehecutivonan di Aruba Airport Authority N.V., incluyendo Project Executive Julian Chung, a duna un splicacion detaya riba e caracteristica innovado di e terminal. E recorido a inclui un demostracion di e sistema ultra moderno pa maneho di maleta, diseña pa elimina ineficiencia y amplia comodidad pa pasahero. E sistema “baggage handling” ta procesa y scan e maletanan di forma completamente automatisa, y e terminal di check-in ta moderno, eficiente y 100% automatisa pa ricibi turistanan cu ta sali for di Aruba despues di nan vacacion.

E innovacionnan aki ta representa un contribucion grandi pa fortalece e posicion di Aruba den Caribe, mientras cu e terminal nobo ta presenta un diseño sostenibel cu a gana certificacion LEED Gold, y ta incorpora elementonan artistico di Armando Goedgedrag cu ta refleha e herencia natural di Aruba. E sistema di maleta ta capacita pa procesa te cu 2,000 maleta pa ora, y ta elimina e necesidad pa pasaheronan check-in y recoge maleta dos biaha den e terminal cu destinacion pa Merca.

Durante e bishita, Prome Minister Eman a recorda e aporte visionario di su ruman homber, Henny Eman (dfm), como ex-Prome Minister di Aruba, cu a negocia cu Merca pa implementacion di Pre-Clearance na Aruba. Segun Eman, esaki a pone Aruba na un nivel halto den aviacion y turismo. “Henny Eman su pensamento riba e balor adicional di pre-clearance a yuda expande nos turismo y posiciona Aruba como lider den Caribe,” Eman a destaca. “E expansion di nos aeropuerto lo pusha nos pa yega un otro nivel.”

Premier Eman a reafirma cu e desaroyo aki ta un testimonio di e capacidad di Aruba pa implementa politica visionario y sostenibel. Aruba ta tuma e pasonan necesario pa keda competitivo den e industria aereo global, mientras ta modernisa su infrastructura, mehora eficiencia y garantisa un experiencia optimal pa tur pasahero.