Podcast nobo di DNM “Cadushi ta Zona cu Dyrick” awenochi 7.00pm

Esaki ta un serie di podcast dedica na entre otro educa y envolucra comunidad local tocante Aruba su medio ambiente, naturalesa, conservacion, herencia cultural, desaroyo sostenibel, salubridad y nan conexion vital y mucho mas.

Awe, diaheubs 27 di maart 2025 pa 7:00 pm e prome episodio “Naturalesa y su importancia” lo ta obtenibel riba media social di DNM manera Spotify, Apple Podcast, Facebook, Instagram y Youtube. E serie, “Cadushi ta zona cu Dyrick”, ta presenta door di Dyrick Wouters, un hoben curioso y pasiona cu Aruba su naturalesa y herencia cultural.

DNM ta invita grandi y chikito pa wak e serie aki y asina bay riba un biahe hunto cu Dyrick, cu ta explora Aruba su biodiversidad, tradicion, esfuerso pa conservacion y retonan ambiental. Den e prome episodio Dyrick ta combersa cu sr. Gisbert Boekhoudt Director di DNM, Yahaira Jansen - Onderzoeker y Nadine Da Silva- Beleidsmedewerker na DNM. E combersacion ta bay over Aruba su Naturalesa y su importancia. E prome episodio ta priminti di ta uno hopi interesante y cu hopi contenido valioso. Cada dos siman lo publica un episodio nobo.

Haya sa mas di Aruba su ecosistema unico, con pa conserva nos fauna, efecto di cambio di clima pa Aruba y con turismo sostenibel ta beneficioso Aruba y con esakinan ta aporta na mantencion di nos identidad cultural, y hopi mas.