Peticion pa Pensioen di Behes
Entrante 1 januari 2015 e edad di pensioen ta subi pa 60,5 aña. E edad di pensioen lo sigui subi cada aña cu 6 luna te cu 1 januari 2024 ora e edad di pensioen ta subi te cu 65 aña. Pa ta un asegurado un persona mester a biba na Aruba entre e edad di 15 aña y e edad di pensioen. Tur persona cu ta asegurado na Aruba pa e pensioen di biehes por aplica pa por ricibi e pensioen despues di a yega e edad di pensioen segun e Ley di pensioen di behes.
Entrante prome di januari 2012 e Flexpensioen-AOV a drenta na vigor. E Flexpensioen-AOV ta encera cu e persona cu yega su edad di pensioen y ta haya e derecho riba un pensioen di biehes di SVb, ta haya e derecho tambe pa pospone cobransa di su pensioen cada vez cu 1 aña. Esaki ta nifica cu por ehempel un persona por scoge pa no cobra su pensioen di biehes ora e yega 61 aña pero ta lag’e aden pa un aña y por cuminsa cobra esaki cu su 62 aña. E siguiente aña e persona por bolbe dicidi di pospone e pensioen cu un otro aña, pa asina e cobra esaki cu 63 aña. Esaki e por haci pa un maximo di 5 biaha. Pa cada aña cu un persona pospone su pensioen di biehes, e suma di su pensioen acumula te na e momento ey ta aumenta cu 7%.
Un luna prome cu bo derecho riba pensioen cuminsa bo mester acudi na departamento di Pensioen di SVb pa entrega e peticion pa pospone bo pensioen. Mester corda cu bo derecho riba pensioen ta cuminsa e luna siguiente na esun cu bo a cumpli bo edad di pensioen. Si bo ta cumpli aña na januari, bo derecho riba pensioen ta cuminsa na luna di februari.