Peticion pa amplia e meta di un negoshi ya estableci aki

NOTA:

Entrante 1 di october 2022 e linea di maneho encuanto otorgamento pa permiso di establecimento di negoshi (“Vestigingsverordening Bedrijven”) a cambia.

Lo trata tur peticion ricibi prome cu dia 1 di october 2022 segun e maneho anterior.

Pa mas informacion por consulta e foyeto adhunto (na Hulandes):

Segun e Ordenansa pa lanta un negoshi (Vestigingsverordening Bedrijven) no ta permiti pa haci actividad empresarial (adicional) sin permiso di minister di Asunto Economico pa haci tal. Ta compronde bao di un negoshi cualkier empresa den cual ta haci negoshi.

Unda pa pidi'e? / Mas informacion na

Seccion Vestiging van bedrijven – helpdesk, number di oficina 15. Telefon 521-2400 ext. 250 di Departamento di Asunto Economico, Comercio y Industria.

Con mi tin di pidi'e? / Kico mi tin di hasi?

Entrega un peticion por escrito cu ta contene informacion tocante e doño (negoshi individual), v.o.f., compania of otro tipo di persona huridico como tambe tocante e actividadnan di negoshi desea (meta, adres, etc.). Por entrega e peticion na Helpdesk di Departamento di Asunto Economico, Comercio y Industria.

Kico mi tin di hiba cu mi?

E peticion por escrito cu stampia (di Awg. 4,00) y e documentonan (si ta aplicabel), menciona den e lineanan di maneho, cu mester entrega.

Kico ta e condicionnan?

Ora di entrega un peticion mester tene cuenta cu e ordenansa menciona y e liñanan di maneho cu ta al caso. Den caso cu ta trata ampliacion di e meta di un persona huridico, su statuut tambe mester permiti esaki.

Tene cuenta cu entre otro:

  • E otorgamento di un permiso segun e Ordenansa pa permiso pa lanta un negoshi (Vestigingsverordening Bedrijven) no ta encera cu esnan envolvi automaticamente lo haya derecho riba e otro permisonan rekeri;
  • Den tur caso mester tene cuenta cu un sede adecua segun e Ordenansa di desaroyo teritorial (Landsverordening ruimtelijk ontwikkeling);
  • E actividadnan cu e negoshi lo desplega, na cada sede, mester tin mas tanto relacion posibel cu otro.

Cuanto e ta costa?

Mester paga stampia (leges) segun Legesbesluit DEZHI pa tratamento di bo peticion. Director di DEACI ta esun responsabel pa stipula e suma. Pa e tipo di peticion aki, e suma ta Awg. 25,00 pa cada cambio (ampliacion di meta) di un permiso ya otorga.