Permiso di estadia y deposito

Admision di stranhero ta basicamente regla den ley, e asina yama Landsverordening Toelating en Uitzetting (LTU) . Ki tipo di documento bo mester exactamente pa por drenta Aruba, ta depende si bo a biaha pa Aruba como turista, pa bin biba of pa bin biba y traha. Punto di salida ta cu ningun hende por drenta Aruba sin un permiso pa estadia temporal of pa un otro tipo di estadia.

E ley di LTU ta consisti di un gran cantidad di articulo. Algun ehempel ta:

  • Articulo 1 LTU ta stipula kende no ta cay bou di LTU;
  • Articulo 3 ta stipula kende por drenta Aruba pa motibo di derecho;
  • Articulo 6 ta stipula cua ta posibel permiso pa estadia;
  • Articulo 7 ta regla condicion di dunamento di permiso;
  • Articulo 8 ta stipula bou di cual condicion un turista por drenta Aruba;
  • Articulo 14 ta regla revocacion/kitamento di un permiso;
  • Articulo 15 ta regla expulsion;
  • Articulo 19 ta regla sacamento for di Aruba (mas pisa cu expulsion).

Hulandesnan cu no a nace na Aruba tin mester di un permiso di estadia pa keda na Aruba, pero nan no tin nodi di paga deposito.

A base di Samenwerkingsregeling y e sentencia di Hoge Raad na Deira, tin regla mas suave pa ex Antiano. Ta admiti profesional ex Antiano drenta directamente pa traha na un compania, pa tempo indefini si e ta cumpli cu e condicion di tin suficiente entrada, un luga di biba y papel di bon conducta.

LTU no ta conta pa tur hende. E siguiente categorianan no ta cay bou di LTU:

  • Personanan naci na Aruba y cu tin nacionalidad Hulandes; 
  • Personanan cu nacionalidad Hulandes cu tabata biba legalmente na Aruba prome cu 1 di januari 1986; 
  • Stranhero cu a naturalisa na Aruba; 
  • Yiunan di e personanan aki riba menciona cu tin nacionalidad Hulandes y cu a nace pafor di Aruba.

E grupo di persona aki riba menciona por drenta Aruba a base di nan paspoort valido. Nan por demostra cu nan ta legal na Aruba dor di mustra un declaracion di Departemento di Integracion, Maneho y Admision di Stranhero (DIMAS), nan paspoort, acto di nacemento, acto di matrimonio, y lo demas manera menciona den nos Catalogo di Producto y Servicio.  
Articulo 3 di LTU ta stipula ken por drenta legalmente. Esaki nan ta:

  • Personanan cu ta den servicio di un di e paisnan di Reino Hulandes of di un otro pais cu ta apunta pa un decreto nacional cu ta contene medida di maneho;
  • Personanan cu ta den servicio di un organisacion internacional;
  • Personanan cu prome cu 1 di januari 1986 tabata den servicio di Antia Hulandes of di teritorio insular di Aruba y a base di esey ta ricibi pensioen y e viuda di e personanan aki cu no a bolbe casa.

E articulo aki ta conta tambe pa:

  • Consul y nan personal;
  • Pa e duracion cu e militar ta staciona na Aruba;
  • Tripulante di barco of avion militar di cierto nacion pa e duracion cu nan ta bishita Aruba y nan tin permiso di e autoridad concerni pa haci tal; 
  • Persona cu nacionalidad Hulandes cu a biba mas cu cinco aña sigui na Aruba cu permiso di estadia of legalmente sin permiso di estadia.

E personanan aki por drenta Aruba y keda biba, a base di nan paspoort y un prueba cu nan ta cay bou di articulo 3 di LTU.

Tin permiso pa estadia temporal. Den principio ta duna tur permiso pa estadia temporal pa un maximo di un (1 aña) y mester renob’e cada aña.Tambe tin permiso pa tempo indefini. 

Un persona cu mester di permiso di estadia semper ta bin biba na Aruba pa traha, cu excepcion di esnan cu nan entrada ta consisti di interes di nan capital, pensionado, studiante y stagiair. Doño di trabou mester pidi e prome permiso di estadia y trabou pa su futuro trahado stranhero. E stranhero mester warda riba su permiso na su pais di procedencia. Ora di yega Aruba mester por presenta un paspoort valido y un asina yama inflightletter (awendia voorlopige toelating tot Aruba) y eventualmente un visa valido, si su pais tin obligacion di visa. A base di e Toelatingsbesluit actual, ta posibel pa bou di un cantidad di circunstancia exonera e obligacion di visa.

Ta otorga un Prueba di regreso ora bo peticion pa un siguiente permiso ta den proceso na DIMAS y bo mester bandona Aruba pa un cierto periodo, of si bo ta desea di haya exoneracion di obligacion di visa y bo tin un permiso valido.

Si bo kier biba temporalmente na Aruba como studiante of stagiair, bo mester haci un peticion pa permiso pa por haci esey. Bo mester tin e permiso aki prome cu bo por cuminsa studia of core stage na Aruba. E permiso aki no ta permiti bo traha na Aruba. E permiso ta valido pa e periodo di bo estudio of stage pero nunca mas largo cu un aña.

Pa trahado domestico cu ta keda biba na e cas unda cu e ta traha como tambe pa pensionado y esnan cu ta biba di interes di nan capital tin regla special.

Peticion pa permiso

Pidimento di tur e permiso y declaracion meciona ta sosode door di yena e formulario destina pa esaki (formulario pa peticion) y entreg’e na Departamento di Integracion, Maneho y Admision di Stranhero (DIMAS). Paga tino! Bo mester haci un cita na DIMAS pa entrega e peticion personalmente y si ta necesario pa duna un splicacion.

Deposito

Ora di bin biba na Aruba ta exigi tambe un deposito. E suma di deposito ta depende di e pais di procedencia.
E suma mester ta suficiente pa por cubri e biaha bek pa e pais di procedencia y pa paga eventualmente otro debenan di e persona na Gobierno. Mester paga e deposito ora di haya e permiso di estadia.