Pago placa di Cessantia

Fondo di Cessantia

Legislador den pasado a tene cuenta cu por pasa cu e doño di trabao no por cumpli cu su obligacion di paga cesantia. Pa garantisa cu un trahado bao tur circunstancia por ricibi su cessantia, e Ley di Cessantia a institui un fondo di cessantia. Ley a encarga SVb pa administra e fondo. Tur doño di trabao tin e obligacion pa contribui na e fondo di cessantia cada aña. E contribucion anual ta 40 florin pa cada empleado den servicio riba prome di januari.

Derecho riba pago di cessantia

Un trahado na Aruba, kende su relacion di trabao ta termina sin cu e tin culpa, tin derecho riba pago di cessantia. E derecho aki ta aplicabel despues cu trahado a cumpli su prome aña di servicio completo. Si duna un trahado retiro pa motibo di su mesun culpa, e no por haci uzo di e derecho di e Ley di Cessantia. Esaki ta e caso, por ehempel, ora e doño di trabao dun’e retiro inmediato debi na motibo urgente manera ladronicia.

Un trahado no tin derecho riba pago di cessantia tampoco, si e mes tuma retiro, a menos cu e a termina e relacion di trabao debi na un motibo urgente, cual ta un consecuencia di e proceder di e doño di trabou. Pa por determina si un trahado tin derecho riba pago di cessantia of no, no ta importa si e trahado ta vast of temporario (basta cu el a traha mas cu un aña) den servicio.

No tin derecho riba cessantia

Funcionario publico, trahado den sector publico y docente den enseñansa subsidia no tin derecho riba cessantia.

Ora un relacion di trabao termina pa motibo di fayecimento di e trahado, su famia no ta haya e derecho riba pago di cessantia. Loke si por, ta cu un (ex) trahado cu tabatin un derecho caba riba un (ex) doño di trabao, su famia cu a keda atras ora cu el a muri (viuda of huerfano) por eherce derecho riba e pago aki.

Tampoco no mester paga cessantia si e trahado na final di su relacion di trabou, a/ta ricibi un pensioen of un recompensa den forma di un pensioen for di e doño di trabao. E suma di e pensioen of recompensa aki mester ta igual of mas halto cu e suma di e pensioen di behes  vigente na e momento ey (suma pa 2009: Afl. 1057,- pa luna). Si kita e pensioen di behes, totalmente of parcialmente, for di e suma di e pensioen di compañia menciona of for di e recompensa den forma di pensioen, e pensioen di compania of e recompensa mester ta por lo menos igual na dos biaha e suma di e pensioen di behes vigente na e momento ey. Si tin derecho of no riba cessantia, no ta mara na un cierto edad, manera mayoria di edad (meerderjarigheid) of edad di pensioen.

E calculacion di e suma di cessantia ta lo siguiente:

• Di prome te cu dies aña completo di servicio: un siman di salario pa cada aña di servicio;
• Di diesun te cu binti aña completo di servicio: 1-1/4 biaha un siman di salario pa cada aña di servicio;
• Pa e siguiente añanan completo di servicio: dos biaha un siman di salario pa cada aña di servicio.

Den un CAO por tin un calculo mas faborabel pa e trahador!

Ora di calcula e suma di pago di cessantia ta tuma un periodo di mas di seis luna despues di e prome aña di servicio como un aña completo di servicio.

Ta calcula e suma di salario pa siman, den caso cu un trahado ta cobra un salario pa luna, door di multiplica cu diesdos e salario di luna (su balor den placa) y despues dividi e suma door di 52. Den caso di un salario pa ora ta calcula e salario semanal door di multiplica e salario pa ora (su balor den placa) cu e cantidad di ora cu e trahado ta traha pa siman. Den caso di salario pa dia, mester multiplica e salario pa dia cu e cantidad di dia cu e trahado ta traha pa siman.

Tin un foyeto na Hulandes tocante e topico aki, brochure Cessantia disponibel.