O’STAD 200 Incubator, un programa duradero pa empodera start ups y scale ups
ORANJESTAD – Recientemente a tuma luga e inicio di O'STAD200 Incubator, un plataforma duradero di desaroyo empresarial, cu ta un paso clave pa start-ups y scale-ups den nos comunidad.
Cu tayeran di guia y oportunidad pa por gana premio, e incubator aki ta enfoca riba busca solucion pa retonan specifico den mercado, door di evalua cada idea empresarial y den caso cu ta presenta un solucion real, cu esaki por ser ehecuta.
Minister di Asunto Economico, Comunicacion y Desaroyo Sostenibel Geoffrey Wever, den un reunion reciente cu e team organisador di O'STAD200 Incubator, a topa cu varios di e oradornan internacional cu a participa den e summit titula "Scaling up our Future." Aki a discuti e vision comun pa avansa e sector di Fintech y Inteligencia Artificial den nos economia, cu enfoke special riba con e programanan aki ta stimula crecemento economico y desaroyo tecnologico.
E "O'STAD200 Incubator Summit" cu a tuma luga diasabra ultimo, tabata un evento di un dia completo, caminda oradornan local y internacional a comparti informacion valioso riba temanan importante manera Automatisacion Empresarial, Seguridad Cibernetico, Fintech, Machine Learning, y Inteligencia Artificial.
E maneho di Ministerio di Asunto Economico ta dedica pa empodera tanto e empresarionan actual como esnan den futuro, pa e sector empresarial sigui crece y contribui na un Aruba mas prospero.