Ora biaha corda tuma medido di prevencion pa cuida bo salud

Na momento di bay den exterior ta importante pa busca informacion riba e factornan di riesgo cu por afecta bo salud of di bo famia na e pais cu bo ta bay bishita, manera:

• Condicion di clima;
• haltura;
• higiena;
• calidad di awa
• malesa transmiti pa sangura;
• malesa gastrointestinal;
• malesa respiratorio infeccioso.

Ta importante pa bo ta informa trempan pa bo por tuma e medidanan di prevencion necesario.

Sa pasa cu biaheronan ta confronta problema di salud den exterior despues di come cuminda contamina. Esaki por conduci na sacamento, diarea, dolor di stoma, keintura, deshidratacion y hasta por keda interna.

Pa evita un situacion asina, Departamento di Salud Publico (DVG) ta conseha pa:

• Sea cauteloso unda bo ta come. No come for di kiosco riba caya;
• Come cuminda cu ta recien cushina y no cu a para pa basta rato;
• No come carni ni berdura curu, esakinan mester ta bon cushina;
• Laba man bon prome cu come. Uza awa y habon of producto cu ta contene alcohol;
• Bebe awa di boter;
• Laba fruta cu awa di boter of come preferibelmente fruta cu bo mes mester casca.

Otro peliger pa biahero ta insecto cu ta transmiti malesa. Tin diferente insecto cu ta carga virus of bacteria cu por haci hende malo. Pa evita di keda infecta cu malesa manera Dengue, Chikungunya, Zika, Malaria of otro, DVG ta conseha pa bisti carson largo, blusa of camisa manga largo, hunta repelente contra insecto, y tene cuidou pa animal salvahe no morde bo.

Si bo ta sufri di malesa cronico, consulta cu bo dokter prome cu bo biaha y si bo ta uza remedi bay cu extra. Ta importante pa averigua tempran si e pais cu bo ta bay bishita ta exigi cierto vacuna manera e.o Malaria, Yellow Fever, COVID of otro. Si esaki ta e caso mester tuma contacto cu seccion di Malesa Infeccioso na 5224200 pa un cita.

Pa siguridad di bo mes y bo famia no lubida di cera un seguro di biahe mirando cu AZV no ta cubri gasto medico den exterior na momento cu bira malo. Vakantie semper ta dushi y pa mantene asina nos mester tuma medida di prevencion.

Pa mas informacion like nos Facebook page Directie Volksgezondheid DVG Aruba, Follow nos

riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw.