Oportunidad pa entrega proposicionnan pa condecoracion real 2025

E file aki ta den archivo.

ORANJESTAD - Aruba a conoce e aña aki un grupo grandi di 18 persona cu a ricibi un condecoracion real pa motibo cu nan a destaca riba diferente tereno y/of a dedica nan mes na nos comunidad.  

Decoratiecommissie Aruba ta informa cu entrante dialuna 6 di mei 2024 pueblo di Aruba por entrega proposicionnan pa personanan ricibi un condecoracion real otro aña na ocasion di Dia di Rey na april 2025.

Pa por  considera un persona pa haya un condecoracion real, mester tene cuenta cu e accento ta cay riba prestacionnan particular pa y den comunidad.

Tin dos categoria:

  • Trabao boluntario, pues trabaonan pa cual e persona no a/ta ricibi salario y pa un periodo di por lo menos 15 aña;
  • Prestacionnan particular cu un persona a haci contra pago, pues den su trabao/funcion. E prestacionnan aki mester ta di un caliber y nivel di e halto ey cu nan ta surpasa locual normalmente ta spera di su trabao y mester tin un balor excepcional pa desaroyo di Aruba.

Tur persona of instancia cu conoce un persona cu na su opinion ta merecedor di un condecoracion real por entrega un proposicion. Pa haci e proposicion aki mester haci uzo di dos formulario special. 
E formularionan aki ta obtenibel entrante dialuna 6 di mei 2024 na balie na entrada na Bestuurskantoor na Playa, na Bestuurskantoor na San Nicolaas y na tur MFA.  

Tambe lo por download e formularionan aki:

Mester yena e formularionan di proposicion completo y detayadamente y mester  firma door di e persona(nan) of e instancia cu ta haci e proposicion (“voorsteller”).
E motivacion di e peticion ta di crucial importancia. 
Pa evalua e meritonan di un persona cu ta propone pa un condecoracion real, ta di sumo importancia pa duna tur informacion pidi riba e formularionan y pa menciona tur dato y informacion cu por duna realse na e trabou(nan)/actividad(nan) desplega door di e persona en cuestion.

Decoratiecommissie Aruba ta enfatisa cu otorgamento di un condecoracion real mester keda un sorpresa pa e persona concerni. Pa e motibo ey ta di suma importancia pa NO informa e persona concerni cu ta bay haci un peticion p’e, ni envolv'e den e proceso di prepara un proposicion. Mester haci e trabao preparatorio den tur secrecia. Esaki lo evita un desapunto den caso cu no ta otorga e condecoracion. Y naturalmente un persona no por propone su mes.

E entrega di un proposicion pa un condecoracion real mester  haci na balie di Bestuurskantoor Oranjestad den un envelop cera dirigi na Bureau Minister van Algemene Zaken, na atencion di Decoratiecommissie Aruba, Bestuurskantoor, L.G. Smith Blvd. 76, Oranjestad, Aruba. 

E organo cu ta carga e nomber “Nederlandse Kapittel voor de Civiele Orden” na Hulanda ta  trata e proposicionnan pa condecoracionnan real. Nan ta duna e conseho definitivo pa cu e condecoracionnan real y nan ta hopi estricto.

Semper mester manda un peticion hopi luna adelanta pa por keda cla cu tur tramite na Aruba y na Hulanda pa asina e personanan por ricibi nan condecoracion na luna di april di e siguiente aña.  
E aña aki e ultimo dia pa entrega un proposicion pa un condecoracion real pa aña 2025 ta diaranson 31 di juli 2024, 4’or pm.

Por fabor tuma nota cu proposicionnan incompleto y proposicionnan cu a drenta despues di diaranson 31 di juli (4 or pm) 2024 lamentabelmente no por trata.  

Aruba tin hopi persona cu ta contribui na nos comunidad mediante trabao boluntario y personanan cu ta destaca realmente den nan trabao. Ta deseo di Decoratiecommissie Aruba pa mira hopi di nan ricibi un condecoracion real na 2025, mescos cu e aña aki. Ta p’esey un peticion na un y tur pa haci un esfuerso pa esaki bira realidad y pa asina Aruba por honra su hendenan balioso. Decoratiecommissie Aruba ta spera cu pa Dia di Rey 2025 tambe comunidad lo reacciona cu hopi entusiasmo pa reconoce esnan cu ta haci trabao importante pa y den nos comunidad.

Den caso cu tin algun pregunta of kier haya mas informacion por tuma contacto cu un di e miembronan di Decoratiecommissie Aruba: 

  • sr. V. Frank (tel. 587-4979)  
  • sra. N. Anthony (cel. 593-1921)
  • sra. I. Nicolaas-Ras (tel. 584-8880)
  • sra. R. Garrido (cel. 593-1820)
  • sr. D. Figaroa (cel. 741-0100)

Tambe por acerca e comision via e-mail: condeco.aruba@gmail.com.

Condecoracion real 2025