Nacemento
Mester inscribi tur baby cu nace na Aruba (duna e nacemento di conoce) na Censo y Registro Civil. E registracion di e nacemento mester tuma luga dentro di cinco dia (e dia di nacemento, diasabra, diadomingo y dianan oficial di fiesta no ta conta den e cinco dianan menciona). Censo y Registro Civil ta pone Ministerio Publico na altura di tur registracion haci despues di e termino di cinco dia.
E tata tin e obligacion di duna e nacemento di su yiu di conoce na Censo. Si acaso e tata ta malo of ta hay’e stroba pa bay Censo, e mama of un otro persona, cu tabata presente ora di nacemento di e yiu, ta autorisa pa laga registra e nacemento di e yui.
E empleado publico ta traha un acta di nacemento for di e declaracion ariba menciona.
Ora di laga registra un nacemento mester entrega e siguiente documentonan:
- Cedula of un otro identificacion valido di esun cu ta registra e nacemento di e yui of esun cu ta reconoc'e como yiu. Den caso di matrimonio tambe mester trece e buki di matrimonio;
- E documento cu un representante autorisa di sala di parto di Horacio Oduber Hospitaal of e partera ta duna como prueba di nacemento di e yiu.
- Copia di un acta di reconocemento si a reconoce e mucha prome cu e la nace (reconocemento di feto);
- Buki di matrimonio, bo por pone nomber di bo yiu eyden. Esaki por pero no ta obligatorio.
For di januari 2001 por registra nacemento di un yiu atrobe na hospital mes. E orario pa haci esaki ta di nueb'or te dies or.
Tene cuenta! No ta inscribi un mucha naci na Aruba automáticamente den censo y registro civil a menos cu e ta un Hulandes naci na Aruba (wak art. 1 di Landsverordening Toelating, Uitzetting en Verwijdering). Muchanan naci na Aruba di mayornan cu tin otro nacionalidad cu esun Hulandes, mester tin un permiso di estadia, prome cu por inscribi e mucha na Censo y Registro Civil.