mr. Joselin Croes ta e proximo director di Arubahuis

rubahuis ta representacion di Aruba na Hulanda, y e mision di Gobierno pa Arubahuis ta pa tin un Aruba presente na Hulanda, den Reino y na Europa. Pa logra esaki, Aruba tin su Minister Plenipotenciario, Sr. Ady Thijsen, y awor un director nobo, Sra. Joselin Croes.

Desde juni 2022 Gobierno a habri e vacatura pa e posicion di Director di Arubahuis y despues cu un comision, cu tabata consisti di Departamento di Recurso Humano, Departamento di Impuesto y un representante di Ministerio di Asuntonan General. A screen un total di 23 candidato, a scoge 3 candidato preliminar basa riba varios criterio, pa despues entrevista tur 3 candidato. Finalmente mr. Joselin Croes a resulta di ta e candidato miho cualifica pa e posicion na Arubahuis. Na october 2022, e comision a acerca Prome Minister, cu ta encarga cu Arubahuis, pa presenta e proposicion aki, y na februari 2023 Conseho di Minister a aproba e nombracion aki. Despues di esaki, a haci algun investigacion mas, incluyendo esun di Veiligheidsdienst, cual tambe a sali bon.

Actualmente mr. Joselin Croes ta den funcion como Minister Plenipotenciario pa Aruba na Washington. Durante e ultimo cinco añanan, Sra. Croes a traha hopi duro riba promove y crea oportunidadnan pa Aruba y pa Arubianonan cu partnernan na Merca riba tereno economico, innovacion, cultural, enseñansa y tambe area diplomatico. Un di e metanan principal di Sra. Croes tabata pa Aruba fortifica e lasonan cu Merca y Canada, y pa saca mas probecho posibel di esaki.

Sra. Croes prome cu su funcion na Washington, tabata Chief of Staff di Minister di Husticia, y prome cu esey e tabata tin su propio oficina di abogado. Aparte di ta abogado e tin aworaki tambe su Masters Degree den Environmental Management. Sra. Croes ta conoci pa su determinacion, positivismo, pasion, y disciplina pa logra su metanan. E ta domina 4 idioma y tin e curiosidad pa siña mas idioma y cultura di otro paisnan.

Gobierno ta gradici sra Glenda Hernandes cu a tuma e encargo di director interino pa un periodo mas largo di loke a pidie na comienso. Sra. Hernandes a sa di trece stabilidad y trankilidad na Arubahuis, y pa esaki, Gobierno ta gradici su persona.