Mosaïque Picassiette, un exposicion unico na biblioteca

Apertura di e Expo ta tuma luga diamars 25 di februari  di 6'or y mei pa 8'or di anochi.

Mientras arte di mosaik tradicional ta usa pida chikito di mosaik, pique assiette ta usa pida di tayo corta pa forma un obra di arte. Na Frances e palabra Pique Assiette ta nifica “recohedo di tayo” of “landron di tayo” y ta referi na usa tayo of recicla tayo kibra, sobra di glas y traha arte cu esaki. Un ehempel di picassiette tin na Chartres, Francia.

Maison Picassiette ta e trabou di artista Raymond Isidore. Ela nace casi na e mes un tempo cu Gaudi (artista renombra di Spaňa). Isidore, cu a siña e technica su mes, tabata recohe y colecta tayonan for di dumpnan y tabata haya donacion di otro hende, y asina a cuminsa decora su cas. Sin ningun training den arte Isidore a pone e pida pidanan den cement y peganan riba e murayanan di su cas cu asina a bira un obra di mosaik. Awendia, La Maison Picassiette ta un destinacion turistico na Francia

Na luna di mei binidero e pareha artista procedente di Sao Paolo, Brasil Solange y Alexandre Piffer, artista international di Mosaïque Picassiette. lo bin Aruba pa duna algun Workshop di Mosaïque Picassiette. Alexandre y Solange Piffer ta procedente di Pompeia - Sao Paulo, Brasil. E pareha a cuminsa traha arte di mosaik na 1999 cu yudansa di mama di Alexandre, cu ta un artista tambe. Alexandre tabata traha e tempo ey como un welderdo fini y tambe cu arte di mosaik. Nan a traha y siña durante 20 aña y a bira experto den e arte aki. Durante e ultimo 7 aña nan ta duna les rond mundo. Nan a bishita paisnan manera Mexico, Alemania, Australia, Schotland y e aña aki lo bishita Aruba. Nan arte di Mosaik ta inclui flor- y animalnan precioso.

Pa añanan Ate Mosa-Atelier Mosaic a sigui e artistanan aki y a tuma cursonan pa domina e tecnica di Mosaïque Picassiette y tambe a duna curso y siña otronan. Pa mas informacion por tuma contacto cu Enrita Werleman na Ate Mosa tel. 661 3200.