Aruba a forma un parti hopi importante den Segunda Guera mundial. E historiado local, señor Dufy Kock, ta traha riba conscientisacion di e area pa recorda nos di e parti aki di nos historia. Durante di Segunda Guera Mundial, Aruba su refineria tabata abastece e avionnan di e aliadonan cu combustibel. E Alemannan a logra isola e forsa di aliadonan di por haya combustibel cual a haci Aruba y Corsou nan unico opcion. E Alemannan a lansa un atake masivo riba Aruba su refineria pa destrui e fuente di combustibel di e aliadonan. Den e proceso aki nan a destrui varios barco y 47 persona a fayece, entre nan, 16 Boneriano y varios Mericano.

Pa hancra e parti importante aki di nos historia, Gobierno lo construi un monumento na e punta di Seroe Colorado cu dos proposito:

• pa nos corda pasado y pa nos siña di dje y evita pa cosnan asina ripiti;
• pa conscientisa nos bishitantenanan di e papel importante cu Aruba a hunga e tempo ey.

Segun Prome Minister Evelyn Wever-Croes, esaki por bira un atraccion turistico grandi. “Covid a siña nos, cu nos mester cambia e producto turistico, cambia loke nos tin pa ofrece na nos bishitantenan. Nos a ripara tambe cu bishitantenan ta prefera actividad turistico cu ta pafo”. Gobierno a institui e comision di Aruba Outdoors Amenities cu ta trahando riba Ayo Rock Formation, Casibari y riba Seroe Colorado caminda e lighthouse ta. Rond e area unda e lighthouse ta situa na Sero Colorado, tin 4 sitio unda antes tabatin bateria militar cu tabata sostene artileria y rond di nan varios bunker. Esaki tabata e sitio primordial di defensa militar pa proteha Aruba for di e Alemannan.

E construccion di e monumento di Segunda Guera mundial lo tin un impacto minimo riba naturalesa, den cual lo mantene e balor di e naturalesa den cercania y manteniendo e costo financiero minimal. Entre e fundeshi di e baterianan lo bin un caminda smal pa cana y wak rond. Ademas e monumento lo contene nomber di esnan cu a fayece na Aruba a causa di Segunda Guera Mundial. Na e monumento lo haya un QR code cual bishitantenan por scan y download e timeline y un pelicula di kico a pasa for di momento cu e submarino tabata yegando cerca, te na momento cu el a bombardia e barconan.

Gobierno mientrastanto a reuni cu varios operador di tour cu a mustra entusiasma pa ofrece esaki na e turistanan den combinacion cu otro actividad cu San Nicolas ta ofrece.

Esaki ta un proyecto cu tin un balor historico y cultural cu ta trece desaroyo pa San Nicolas. Ta programa pa inaugura e monumento dia 4 of 5 di mei 2024. Esaki ta e dia cu nos ta conmemora e segunda guera mundial