Minister Geoffrey Wever a reuni cu embahador Hulandes staciona na Venezuela

A dialoga entre otro, riba tema di economia, e relacion comercial entre Venezuela y Aruba despues cu recientemente a reanuda trafico maritimo entre e dos paisnan. Aruba ta midiendo un impacto positivo mirando e cantidad creciente di productonan - specialmente di nutricion basico - cu ta importa for di Venezuela desde cu a habri frontera maritimo.

Tambe a elabora riba e exito y follow-up di e “Trade Mission” recientemente na Colombia. Mester subraya cu Embahada di Reino Hulandes a hunga un rol importante den haci esaki un exito y a mustra nan disponibilidad pa sigui traha hunto na beneficio di Aruba.

Relacionnan bilateral cu paisnan bisiña, ta keda importante y ta forma parti importante di Gobierno su maneho. "Mester mantene cooperacion economico saludabel entre paisnan bisiña. Aruba riba su mes como un isla ta dependiente di otro paisnan pa comercio".

Minister Geoffrey Wever ta agradecido pa e bishita di embahador Schuddeboom, y e disponibilidad desplega di parti embahada di Reino Hulandes pa mehora lasonan economico y comercial, y resolve cualkier retonan di logistica cu por existi, pa asina promove comercio. Por ultimo, a discuti e posibilidad pa un trade mission pa Venezuela, siguiendo e exito di e  mision comercial na Colombia.