Minister di Defensa di Hulanda Ruben Brekelmans a reuni cu Gobierno

Ademas Minister Brekelmans a reuni cu Gobernador y Comandante di Marinierskazerne Savaneta riba e rol di Marina Hulandes staciona na Aruba.  

Prome Minister a indica cu no ta un secreto cu e situacion na Venezuela ta preocupante, no solamente pa Aruba sino pa Hulanda tambe, y p’esey gran parti di e reunion tabata basa riba e tema aki, y con Aruba ta prepara pa cualkier eventualidad. Prome Minister a duna di conoce cu aunke e situacion cu Venezuela ta aden no te e miho, comunidad di Aruba por ta trankil mirando cu ainda no tin ningun indicacion di riesgo of menasa pa nos isla.

E plan pa 2025 ta pa Aruba y Hulanda sigui traha hunto riba e desaroyo di mas plan pa asina den caso di cualkier incidente, of si tin infiltracion di forsanan di otro pais via Venezuela pa ataca Aruba, cu nos ta bon prepara y no mester tin ningun preocupacion.

Durante e reunion tambe a elabora riba e tema di e posicion di e "Arumillers". Prome Minister a indica cu Gobierno ta den e fase pa profesionalisa e Arumillers pa asina e personanan cu ta den Arumil haya un posicion mas fuerte ancra tanto den ley como den nan posicion huridico como militar. E proyecto aki ta den su fase final debi na e bon cooperacion cu tin entre Aruba cu Hulanda.

Ademas a pasa riba e tema di gobernacion y e relacion cu tin actualmente entre Aruba y Hulanda, y con por fortifica e relacion aki pa yuda nos aki na Aruba un poco mas.