Metanan nucleo (kerndoelen)
Na 2018 Minister di Ensenañsa, Ciencia y Desaroyo sostenibel, a firma e meta nucleo pa scol primario, esta pa tur scol preparatorio y basico na Aruba.
Cu aprobacion di e metanan nucleo a keda oficialisa un etapa nobo y historico den enseñansa na Aruba. E metanan aki ta describi tur locual cu tur scol mester logra alcansa cu nan alumnonan na final di scol primario.
Vision di enseñansa y e importancia di meta nucleo
E vision cu kier alcansa cu e metanan ta: “Enseñansa cu sentido cu ta conduci na individuo consciente y na un comunidad solidario”
Cu e vision aki ta aspira pa yuda forma futuro cuidanano capacita pa enfrenta reto riba diferente tereno den bida y alaves crea cuidadano cu ta contribui na un manera positivo na nos comunidad.
Meta nucleo ta duna descripcion general di e contenidonan di enseñansa y ta indica locual ta aspira pa alcansa na final di scol primario. E metanan ta forma un instrumento primordial cu ta duna indicacion na cada maestro tocante e contenido minimal cu e mester ofrece na e alumnonan. E metanan nucleo ta consisti di tres componente: conocemento, habilidad y actitud. E metanan nucleo ta garantisa contenido di calidad y mas importante, contenido relevante pa nos muchanan na Aruba den un contexto autentico. E metanan nucleo mester conduci na alcansa e vision cu a stipula pa enseñansa na Aruba.
E areanan di formacion
Den enseñansa primario ta distingui 7 area di formacion y pa cada area a desaroya e metanan nucleo. Banda di e areanan aki tambe a desaroya e metanan nucleo general cu ta dirigi riba habilidadnan cu e bida moderno ta exigi (21st century skills).
E areanan di formacion ta:
|
Metanan general | Colaboracion, comunicacion efectivo, strategia pa siña, ICT |
|---|---|
| Idioma y comunicacion | Papiamento, Hulandes, Ingles y Spaño |
|
Matematica | e.o. concepto di number, geometria, relacion |
| Formacion Personal | e.o. identidad, desaroyo social, norma y balor |
| Ciencia & Tecnologia | e.o. conocemento di naturalesa, biologia y ICT |
| Hende & Comunidad | e.o. historia, geografia y trafico |
| Movecion & Salud | gymles y salud |
| Arte | e.o. e disciplinanan di arte, pensamento creativo, consciencia multicultural |
Implementacion
E intencion ta pa introduci e metanan den fase. Asina a introduci e metanan di matematica den aña escolar 2017-2018. Awo ta turno pa introduci e metanan di e areanan idioma & comunicacion, unda ta trata e idiomanan Papiamento, Hulandes, Ingles y Spaño.
Por ultimo lo implementa e otro areanan cu ta hende & comunidad, ciencia y tecnologia, movecion & salud, formacion personal, arte y informatica.
Den e fase aki lo introduci e metanan den un forma holistico y integral den forma tematico. Naturalmente cu lo ofrece den cada fase recapacitacion na e maestronan pa loke ta trata e contenido nobo di cada area como tambe pa e parti practico, esta e didactica nobo cu e cambio ta exigi.
Cu e metanan nucleo aki ta aspira pa forma alumnonan cu ta miho prepara pa e retonan actual di bida diario, miho acoplacion entre scol primario y secundario, miho ekipa pa sigui un carera di estudio cu exito.
Pabien y un danki na tur cu a contribui na realisacion di e documentonan aki.
Pa mas information por consulta e “Kerndoelendocument Arubaans Primair Onderwijs”.