Measles (sarampi), un menasa creciendo
ORANJESTAD - Departamento di Salud Publico (DVG) ta monitor di cerca e desaroyo tumando luga na Europa y Merca relaciona cu casonan di transmision di e virus di Sarampi.
“Sarampi” ta un di e malesanan mas contagioso cu ta existi y ta causa pa e virus “genus Morbillivirus”. E virus ta transmiti su mes hopi facil via aire na momento cu e persona infecta ta tosa of nister.
E malesa por ocasiona complicacion severo y hasta morto. Prome cu introduccion di e vacuna contra Sarampi na 1963, tur aña un cantidad grandi di mucha particularmente bou di 5 aña tabata fayece debi na e malesa aki. Desde e introduccion di e vacuna contra sarampi, e casonan mundialmente a baha y na Aruba desde su introduccion na 1979 nos no a mira e malesa aki mas desde decadanan 80. Esaki ta danki na e grado di vacunacion halto (95%) bou di nos muchanan entre edad di 0 cu 10 aña.
Pero recientemente World Health Organisation (WHO) a bati alarma atrobe pa aumento den casonan di sarampi tumando luga den diferente pais di Europa y USA (particularmente Texas) bou di mucha como adulto. E Organisacionnan Mundial di Salud ta di opinion cu e brote di sarampi ta tumando luga debi na reduccion den grado di vacunacion particularmente despues di e Pandemia di COVID. Mas hopi persona a dicidi cu nan no ta vacuna nan yiu contra sarampi, locual a causa cu e immunidad di e pais ta baha ocasionando cu e posibilidad ta bira mas grandi pa e virus transmiti su mes atraves di esnan cu no ta vacuna pero tambe esnan mas vulnerabel.
Mescos cu e virus di COVID tabata imposibel pa nos a evita e virus di drenta Aruba, ta importante pa internamente nos pais ta bon prepara pa maneha transmision di e virus aki ora esaki drenta y alaves ofrece proteccion na e grupo di ciudadanonan mas na riesgo di bira hopi malo of hasta fayece si nan bin den contacto cu e virus.
Den e siguiente simannan DVG lo bay ta informa comunidad riba e maneho pa cu transmision di sarampi.
Bo salud ta bo responsabilidad, tuma accion pa cuid’e y proteh’e
Pa mas informacion:
- Like nos Facebook page Directie Volksgezondheid DVG Aruba,
- Follow nos riba Instagram directie_volksgezondheid_aruba,
- Subi nos website www.dvg.aw
- Yama nos na 5224200 of mail nos na servicio@dvg.aw.
