Mantencion di orden publico durante Carnaval 71

Pa exactamente 11:00 mainta SMAC conhuntamente cu KPA a haci inicio di e parada grandi di Oranjestad, cual SMAC a dedica na KPA.

Carnaval 71 a conta cu participacion di 9 grupo, cu a sa di pone mas o menos 3000 participante riba caya disfrasa na un sin fin di fantasia. Ademas, Cuerpo Policial Aruba a conta cu 220 personal riba pia, cu a consisti di entre otro Polis Uniforma, ME, Motor Unit, K-9, Mobiel Comando, O.C.C., Flex team, Trafico, Planologie, Departamento di Recherche, personal administrativo y tambe personal di CEA.

Apesar cu e gran mayoria di e multitud ta bay carnaval pa gosa na manera di aplaudi, semper tin algun mirones cu ta actua di manera indesea. Durante parada grandi na Oranjestad, Polis a detene 36 persona. Detencion tabata entre otro pa bringamento, no sigui ordo di polis, buracheria, posicion di droga y di arma blanco. Carnaval 71 asina mes a resulta den menos detencion compara cu 2024 den cual tabatin 41 detencion.

Ademas Unidad Motorisa tabata activo cu control di trafico dirigi riba maneha bou influencia di alcohol despues di parada. A controla prome, durante y despues di parada grandi. A controla varios chauffeur y a detene 13 persona, di cual a kita rijbewijs di 9 chauffeur. Compara cu 2024, e cantidad di dentencion den trafico a keda mescos.

Total detencion

Como analisis KPA ta compara e cantidad di detencion total di Carnaval 70 y 71:

• Na 2024 tabatin 134 detencion total den e temporada di Carnaval 70
• Na 2025 tabatin solamente 87 detencion total den Carnaval 71

Esaki ta un reduccion total di 35% cu ta nificina cu nos comunidad a sa di comporta e aña aki responsabelmente durante carnaval. 

KPA ta satisfecho cu e cifra aki y ta gradici nos comunidad cu ta haci esaki posibel!