Maneho di tiramento di pisca (Spearfishing)

Aña pasa na Centro di Bario Playa Pabou a tene un reunion cu tiradonan di pisca unda nan a scoge nan representante pa forma parti di un comision pa asisti den e maneho nobo di spearfishing. Ministerio di Naturalesa hunto cu e comision a reuni cu varios stakeholders, manera Santa Rosa, Directie Natuur en Milieu, Fundacion Parke Nacional Aruba, Warda nos Costa, Polis Maritimo y Directie Scheepvaart, pa asina den un manera participativo yega na un maneho duradero.

Algun cambio cu ta resalta den e proposicion di maneho nobo ta e sistema di permiso. Santa Rosa como e departamento di Agricultura, Cria y Pesca ta esun encarga cu maneho di permiso y registracion. Den e maneho aki lo regla tiramento riba pisca no protegi como pisca invasivo (manera lionfish). E proposicion di maneho di Spearfishing ta cu lo permiti esaki solamente cu un permiso di Minister di Naturalesa. E permiso di spearfishing lo ta valido pa un aña y ta mara na un suma anual.

Santa Rosa lo controla importacion y benta di speargun, piesa y pole spear. Ademas, esnan cu ta desea di practica spearfishing lo mester sigui un curso obligatorio cu lo enfoca riba conocemento di nos especienan marino, ley y regulacion relevante, como tambe e aspecto di siguridad pa e tirado di pisca.

Tambe a presenta cambio den uzo di herment di e tirado di pisca cual ta entre otro cu ta permiti arma di spearfishing cu lastik (power bands) y ta prohibi arma di pesca neumatico(presion di aire). Lo crea un lista positivo cu ta indica cua especie di pisca uzando arma cu trekker y especie invasivo cu lo permiti arma sin trekker p.e. lionfish. Lo introduci regulacion di e areanan asigna y metodo cu por uza pa e tirado di pisca.

Un otro parti cardinal di e maneho nobo ta datonan. Cada tirado di pisca mester registra su datonan obligatoriamente minimo 1 biaha den cada 6 luna. Esaki ta inclui informacion di e especie, su tamaño y area. Santa Rosa ta responsabel pa colecta y maneha e informacion nan aki.

Ehecucion di un maneho ta encera control y riba esun di spearfishing lo rekeri desaroyo di un otro maneho pa delinea e infraccionnan cu tin revocacion di permiso como consecuencia. Actualmente tin un gedoogbeleid vigente, den futuro lo tin un island round marine park unda departamento di gobierno lo aporta na FPNA pa haci e control necesario cu e conocemento di e materia.

Cu e presentacion di maneho nobo, Ministerio di Naturalesa, cu aprobacion den Conseho di Minister, lo inicia e proceso na Departamento di Legislacion y Asunto Huridico (DWJZ) pa formalisa e maneho.