Lista di candidato 2013

Publicacion di fecha pa entregamento di lista di candidato

23 di juli 2013 padilanti, e apoderadonan di cada partido politico a haya un carta for di Registro Civil/Censo  den cua ta para e dia pa entrega  nan lista. Den e carta ta specifica e rekisitonan pa entregamento di lista. Tambe ta haya e formulario pa yena e lista di candidato.

E lista di candidato mester contene datonan corecto manera fam, nomber, inicial, fecha di nacemento y adres. Tambe e secuencia cu e candidatonan ta aparece riba e lista mester ta determina. Ora di entregamento di lista di candidato tambe mester entrega e siguiente documentonan:

  • Un declaracion di consentimento; e candidato mester agrega un declaracion unda e ta bay di acuerdo pa aparece ariba e lista;
  • Un potret preto y blanco di cuatro pa seis cm, cu ta duna un bon imagen di e candidato cu ta aparece mas ariba riba e lista;
  • Un comprobante di pago di Afl.1000,00 na Departamento di Finansas. E suma aki den principio tin e meta pa evita participacion den un forma superficial na eleccion.

E lista di candidato mester cumpli cu diferente rekisito: 

  1. Riba un lista mag di aparece maximalmente 29 candidato, 8 mas cu e total di miembronan di Parlamento cu por wordo eligi;
  2. Partido politico cu no tin representacion den Parlamento mester colecta un total di 551 firma di votado pa por participa na e eleccion (551 voto cu ta igual na por lo menos un porciento (1%) di e total di e votonan valido, cu e Conseho Electoral a determina durante e eleccion pasa, afgerond pariba te na un cifra completo);
  3. Un candidato mag di aparece unicamente riba un lista di candidato;
  4. Un votado por sostene solamente un lista di candidato.

Entregamento di lista

Dia 9 di augustus 2013 e partidonan politico por a entrega nan lista di candidato na e presidente di Conseho Electoral Sr. Ing. mr. Hubert C.Maduro.
Luga: ex Havana Beach Club (Nicky Beach)
Ora: 09:00uur - 16:00 uur

Seis partido politico cu ta inscribi na Conseho Electoral por a participa den e eleccion pa miembronan di Parlamento di dia 27 di september 2013.  Ademas di e partidonan AVP, MEP y PDR,  cu ta representa actualmente den Parlamento, e partidonan  PPA, RED y UPP  tambe a participa na eleccion. 

Partido Politico

•

AVP - Arubaanse Volkspartij / Christen Democraten Aruba
Apoderado: Señor mr. M.G. Eman
Apoderado suplente: Señor mr. P. E. Croes 
 • MEP - Movimiento Electoral di Pueblo
Apoderado: Señora mr. E. Wever Croes
Apoderado suplente: Señor V. E. J. Arends  
 •PDR - Partido Democracia Real
Apoderado: Señor mr. A. C. G. Bikker
Apoderado suplente: Señor A. I. Tromp
 • PPA - Partido Patriotico di Aruba
Apoderado: Señor B. J. M. Nisbet
Apoderado suplente: Señora G. R. Gil
 •RED - Red Democratico
Apoderado: Señora Dionisia Theresita de Cuba
Apoderado suplente: Señor Adislao Miguel Rasmijn
 •UPP - Union Patriotico Progresista
Apoderado: Señor Candelario A.S.D. Wever
Apoderado suplente: Señor Raymond R. Hernandez

Controla lista di candidato 

Dia 23 di augustus 2013 Conseho Electoral a tene un sesion  pa controla e listanan. Te cu 26 di augustus 2013 Conseho Electoral tabata por a notifica un partido por escrito tocante e omision cu nan a constata, por ehempel si falta documento. E partido tabata tin te cu 29 di augustus 2013 e oportunidad pa coregi loke tabata  falta, manera cu tabata  indica den e carta, door di entrega e documentonan aki na Conseho Electoral. 

Decision tocante validez di e listanan

Dia 30 di augustus 2013 Conseho Electoral a tene un sesion publico den cual nan a declara e listanan di candidato valido. Segun articulo 31 di Ley Electoral, Conseho Electoral ta publica e listanan di candidato. Tur hende por tira un bista den e listanan aki na oficina di Registro Civil/Censo. 

Conseho Electoral durante un sesion publico, a numera cada lista pa medio di sorteo y tambe nan a duna color na cada lista segun preferencia di e partido.

Adhunto por haya e listanan di candidato di e partidonan cu lo participa na eleccion di dia 27 di september 2013: 

Lista di candidato eleccion 2013

Numeracion y dunamento di color na listanan 

Den caso cu no tin apelacion, e ora ey Conseho Electoral lo pasa pa numera e listanan y duna nan un color. Finalmente ta publica e lista valido di candidato cu nan number y color.

Den un sesion publico riba 3 di september 2013 Conseho Electoral a duna e siguiente numbernan pa medio di sorteo. Tambe a duna e color di preferencia  na cada lista: 

Numeracion y dunamento di color

1.
PPA - Partido Patriotico di Aruba		Oranje

2.
AVP - Arubaanse Volkspartij / Christen Democraten Aruba		Berde
3.
PDR - Partido Democracia Real		Cora
4.
UPP - Union Patriotico Progresista		Blauw
5.
MEP - Movimiento Electoral di Pueblo		Geel
6.
RED - Red Democratico		Blanco

Stembiljet 2013

Programa di partido politico

Adhunto e programa di e partido politiconan cu ta participa na e eleccion pa miembro di Parlamento, di dia 27 di september 2013. Den e programa di partido, e partido ta duna su punto di bista y e ta describi kiko e lo hasi, si e drenta gobierno: