Klein vaarbewijs (y duplicado)
Si bo kier ta tras di e timon di un boto, bo mester tin un vaarbewijs valido, segun articulo 3 di e Landbesluit Openbare Wateren en Stranden. E vaarbewijs ta valido te e dia cu bo cumpli 65 aña. Den caso cu bo perde bo vaarbewijs, bo por pidi un duplicado na e balie di Directie Scheepvaart.
Articulo 4 di Landsbesluit Openbare Wateren en Stranden ta haci mencion di e casonan na unda ta haci excepcion pa loke ta trata un vaarbewijs. No mester di un vaarbewijs den caso cu:
- ta uza e embarcacion exclusivamente of principalmente pa nabega pa y for di un destinacion pafor di Aruba y e capitan tin un diploma valido di nabegacion y di pesca riba lama;
- ta move e embarcacion solamente door di propio esfuerso (door di forsa bruto);
- ta uza e embarcacion solamente pa chupa lodo pa habri ruta di nabegacion y e embarcacion ta mara na e sitio unda e ta haci e trabao;
- e embarcacion ta un barco pa biba aden y no ta wordo uza pa nabega;
- e embarcacion ta pertenece na e categoria di entre otro jetski, scooter di awa, y no ta uze den combinacion cu waterski.