Keurmento

Keurmento di instalacion electrico

Mester keur e instalacion electrico di un cas prome cu por pone den uzo. Keurmento di e instalacion electrico ta sosode door of na nomber di Servicio di Inspeccion Tecnico (Dienst Technische Inspecties). Pa aproba un instalacion, e mester cumpli cu e siguiente condicionnan:

• E instalacion concerni mester cumpli cu e reglanan di Landsbesluit Installatievoorschriften Elektrische Inrichtingen  (AB 1996 no. GT5);
• E instalacion concerni mester cumpli cu e reglanan di ‘Nederlands Normalisatie Instituut’, norma NEN 1010;
• E instalacion concerni mester ta aproba dor of bou di supervision di un instalador reconoci.

Prome cu bo entrega e peticion na Servicio di Inspeccion Tecnico (Dienst Technische Inspecties) pa aprobacion final, e instalador reconoci mester a entrega e peticion na NV Elmar pa fiha e punto di conexion y pa determina si e capacidad cu ta pidi, ta realmente disponibel.
Tur instalacion electrico di edificionan cu tin un permiso di construccion cu nan haya den aña 2007, mester dispone di un “ground” propio cu resistencia di 100 ohm y tur grupo mester ta sigura cu aardschakelaars 30 mA.

Na loket di Servicio di Inspeccion Tecnico (Dienst Technische Inspecties) tin un lista disponibel di tur instalador reconoci.

Ora di entrega e peticion, bo mester e siguiente documentonan:

• Peticion pa carchi di keur cu nomber di doño y adres di e instalacion cu mester keur;
• Dibuho di instalacion;
• Copia di e permiso pa construi di e percela di cual mester keur e instalacion electrico of e carchi di keur di e aardmeting.

Bo por calcula e gasto pa keurmento di bo instalacion electrico dor di uza e programa simpel y facil pa uza aki bou:

Keurmento instalacion di gas

Prome cu suministra bo cas cu gas, Aruba Gas Supply Co. Ltd. ta keur e instalacion di gas. Tin otro regla pa keurmento di tanki di gas y instalacion di gas pa un edificio comercial. Servicio di Inspeccion Tecnico (Dienst Technische Inspecties) ta keur esakinan.