Esaki ta un paso significante den colabracion pa hunto enfrenta desafionan di cambio climatico y desaroyo sostenibel.

E rapport, cu ta un compilacion di contribucion activo di Aruba, Boneiro, Corsou, Sint Maarten, Saba y St Eustasius, ta duna un analisis profundo di e desafionan climatico cu e islanan ta enfrenta cu ne, hunto cu strategianan y plannan relaciona cu adaptacion climatico. 

IPDC ta un colaboracion unico entre gobiernonan, institucionnan financiero, expertonan scientifico, y profesionalnan rond mundo. E mision ta pa priorisa e awa cu ta rondona nos den esfuersonan pa adaptacion climatico y e implementacion di adaptacionnan di deltanan, areanan di na costa y islanan. Pa logra e obhetivo aki, IPDC a enfoca riba e demanda pa supera e bareranan di implementacion y fortalece gobernacion, desaroyo di conocemento, capacidad, y acceso na financiamento. 

“E complehidad di e deasafio di cambio climatico por ta abrumador. IPDC ta fungi como un plataforma cu ta unifica pa yega na solucionnan colectivo cu ta contribui na un un futuro sostenibel.” - Timo Kelder, coordinador di IPDC den region Caribe. Segun Dr. Ryan R. Peterson, Presidente di NCRC Aruba, e programa di IPDC ta provee un caminda esencial pa delinea y combina esfuersonan, ambicionnan colectivo di resiliencia climatico, y na mes momento uni  e recursonan di scarsedad financiero y di conocemento entre e islanan.

“E lansamento di e proyecto aki ta un stap importante cerca Paisnan den Reino Hulandes pa colabora pa un futuro cu resiliencia climatico y uno cu ta trata naturalesa na un manera responsabel,” Minister di Transporte, Integridad, Naturalesa y Asuntonan di Adulto Mayor, Sr. Ursell Arends a meciona.

“Door di comparti conocemento y experiencianan colectivo, nos por desaroya y implementa solucionnan strategico y tambe salvaguardia y fortalece nos comunidad y biodiversidad ecologico for di e efectonan adverso di cambio climatico.” Dr. Ryan R. Peterson ta afirma.

E rapport ta subraya e desafio unico cu cada pais ta enfrenta y ta identifica strategia specifico y plannan cu ta implementa pa adapta pa e medio ambiente cu ta cambiando. For di mehora e suministro di awa y promove energia sostenibel te cu fortalece e defensanan di costa y preserva e biodiversidad, e rapport ta provee un perspectiva integral di esfuersonan pa contribui pa un sociedad resiliente. 

E IPDC rapport ta enfatisa e importancia di cooperacion internacional y e rol di comunidadnan local pa combati e impacto di cambio climatico a traves di colaboracion riba tur nivel. Di gobiernonan local pa organisacionnan internacional, nos ta implementa medidanan efectivo pa haci di nos islanan uno mas resiliente y asegura e futuro di nos comunidadnan. 

E rapport ta disponibel pa publico a traves di e website di National Climate Resilience Council of Aruba. Pa tene un bista riba e progreso di e aceleracion di e implementacion y adaptacion, IPDC ta publica un informe di progreso cada dos aña.