Informacion cu ta circulando relaciona cu variante nobo di COVID ta infunda.

E variante XBB.1.16 no ta uno nobo, eta conoci for di april y contrario na e informacion cu ta circula, ta duna sintomanan hopi leve. Na Aruba, DVG ta sigui registra pa siman casonan positivo di COVID pero no tin motibo na e momento aki pa lanta e preocupacion den comunidad mirando cu e cantidad di casonan ta limita (7 pa siman) y mayoria caso di COVID ta recupera sin ningun complicacion.

Banda di COVID tambe ta circula riba nos isla otro virusnan, manera Adenovirus, Rhinovirus A/B/C, Parainfluenza virus, Metapneumovirus y RSV cu ta duna sintomanan manera entre otro:

• Dolor di garganta;
• keintura;
• tos;
• congestion di sinus;
• diarea y/of sacamento;
• dolor di cabes/draaimento di cabes.

Nos ta observa cu den mayoria caso di sintomanan respiratorio Rinovirus y Metapneumovirus ta afectando hobennan entre edad di 0 pa 17 aña mientras di otro banda COVID ta afectando esnan entre edad di 18 aña cu 65 aña of mas.

Departamento di Salud Publico, cu ayudo di diferente partners, continuamente ta monitor pa medio di sentinel pa virus cu por ta circula y causa molester of menasa pa salud publico di Aruba.

DVG ta conseha comunidad pa sea mas consciente di nan hygiena di man, evita contacto cu hende cu ta malo cu sintoma di griep,come mas fruta y berdura, bebe hopi awa y bebe suplimento cu por yuda hisa defensa di e curpa.

Pa mas informacion like e Facebook page Directie Volksgezondheid DVG Aruba, follow DVG riba Instagram directie_volksgezondheid_aruba, bishita e website www.dvg.aw, yama 5224200 of manda bo email pa servicio@dvg.aw.