E Gold Seal of Approval accreditation preliminar di JCI ta simbolisa e compromiso di e proveedor di cuido medico cu e dedicacion pa mehora continuamente e calidad y siguridad medico.

Durante e añanan cu a transcuri, ImSan a traha hopi duro pa logra e acreditacion di JCI. Ricibi e "preliminary Gold Seal of Approval" aki no tabata facil y ta danki na inversion miyonario y cu sosten di Gobierno, awo por celebra e logro aki. 

E acreditacion di JCI lo habri posibilidad nobo pa ImSan por sigui crece y mehora e calidad di cuido na Aruba y explora turismo medico. ImSan lo ta e prome hospital acredita den region di Caribe Hulandes. Actualmente tin un total di 1000 instituto medico den 70 pais cu tin e acreditacion aki y Aruba pronto lo ta oficialmente riba e lista prestigioso aki.

E logro aki ta danki na e dedicacion y compromiso inconditional di tur esnan trahando na ImSan. Minister di Turismo y Salud Publico, den nomber di Gobierno ta felicita dr. Rajnherc y personal di ImSan cu e logro grandi aki.