E comision ta consisti di diferente departamento gubernamental y no-gubernamental (NGO) y ta conseha Gobierno riba e cumplimento di e Tratado Derecho di Mucha pa muchanan di 0 te cu 17 aña.

Riba recomendacion di Nacionnan Uni na aña 2022, e comision ta enfoca riba e area specifico di husticia hubenil. Husticia hubenil ta referi na e maneho di e sistema hudicial pa hoben di 13 te cu 17 aña. Na momento cu un infraccion di ley tuma lugar, un persona por haya su mes den contacto cu husticia y instancianan concerni. E comision ta profundisa su mes riba e forma con ta implementa e Tratado Derecho di Mucha den e contexto di husticia hubenil. En conexion cu esaki, a cuminsa colecta informacion di tur instancia (stakeholders) cu ta duna asistencia den e trayecto aki na hobennan cu ta na riesgo of cu a haya nan mes den contacto mas extensivo cu husticia.

Durante e prome consulta e comision a ricibi presentacion for di Sra. Seraida Pemberthon di Stichting Reclassering en Jeugdbescherming, y di Sr. Alrick Dirksz di Departamento di Salud Publico, Seccion Cuido Hubenil. Sra. Pemberton a enfoca riba e guia brinda na e hobennan y e proyectonan cu tin na caminda pa prevencion y rehabilitacion di hoben cu ta na riesgo. E experticio di Stichting Reclassering en Jeugdbescherming ta un aspecto esencial den e maneho di prevencion di criminalidad hubenil. Ademas, sr. Alrick Dirksz di Departamento di Salud Publico, a presenta en corto, e resultado di su investigacion riba e hobennan encarcela na KIA, riba e estado actual di “jeugddetentie”, cu enfoke riba e guia pa cu salud y bienestar di e hobennan aki.

E comision tin varios encuentro cu stakeholders riba e tereno di husticia hubenil cu lo bay tuma lugar pronto. Cu e informacion ricibi lo traha riba un plan di accion pa mehora e implementacion di e Tratado di Derecho di Mucha den e area aki.
Pa mas informacion di derecho di mucha por bishita: https://derechodimucha.org.