Hospital Dr. Horacio Oduber (HOH)
Hospital Dr. Horacio Oduber (HOH) ta un hospital general di tamaño mediano, unda ta dispone di tur specialidad basico y algun super specialidad. Specialistanan medico ta den servicio di hospital y pa medio di un contract cu AZV nan ta afilia na hospital. Hospital tin un departamento di emergencia (eerste hulp) hopi druk cu ta trata mas o menos 55.000 pashent pa aña. Tin un centro di trauma nivel III disponibel, como tambe un departamento combina cu ta inclui Cuido Intensivo/Cuido mediano/Cuido Coronario (Curason) cu 12 cama, clinica di hemodialyse, tres departamento di psychiater, cinco sala di operacion, banco di sanger, clinica pa trata dolor, centro di oncologia pa tratamento durante dia (Dagbehandeling), cuido di enfermo pa dia (dagverpleging), clinica pa trata herida, policlinica interno y externo, departamento pa parto, post di dokter di cas, departamento di fisioterapia y rehabilitacion, tres departamento pa investigacion di diagnostica, diferente laboratorio, botica di hospital, camber di caterisacion di curason, shete departamento pa cuido di enfermo, departamento di servicio pa maternidad, departamento pa mucha, camber di couveuse y diferente otro servicio facilitario.
Pa medio di AZV, HOH tin relacion di cooperacion cu diferente hospital academico y specialisa na Colombia y Venezuela.
Tur specialista medico por pidi pa manda un pashent (verwijzing) pa exterior pa tratamento avansa cu no por tuma luga na Aruba, despues di cual AZV of seguro di malesa particular ta keda encarga pa manda e pashent pa tratamento den exterior. Hopi biaha ta manda pashent pa tratamento den exterior relaciona cu catheterisacion y operacion di curason, cirugia cardio-vascular y thorax, neurocirugia complica, cuido intensivo neonatal, cuido perinatal di halto riesgo y obstetricia (embaraso, parto) complica, oncologia avansa, cirugia complica di trauma y di reconstrucion. Tambe regularmente ta manda pashent pa centro di kemadura na Venezuela y ta manda pashent pa bestraling (radio terapia) na Corsou.
HOH tambe ta ricibi regularmente pashent for di hospital mas chikito den e region, manera for di Bonaire y Isla Riba. Ora cu no tin cama den cuido intensivo of couveuse ta manda pashent for di Corsou pa Aruba.