SVT ta un trayectoria di formacion social cu a inicia na 2011 cu e meta pa duna hoben entre 17 y 24 aña, oportunidad di trece cambio den nan bida, duna nan guia den nan formacion, educacion, disciplina y desaroyo personal. Hopi hoben ta busca un miho futuro cu apoyo di nan mayornan, y cu e programa aki, nan ta haya oportunidad pa un bida nobo.

Cada hoben tin derecho di un miho futuro y p’esey mester anima y crea oportunidad pa nos hobennan. Gobierno ta felicita y gradici e mayornan cu a duna nan yiu e apoyo pa forma parti di Formacion Social.

“Nos ta celebra boso victoria y Aruba ta kere den boso. No solamente esey, Aruba mester di boso, pero ohala e logro aki keda un fundeshi pa sigui como un maneho. E mester sigui como un trapi pa e siguiente nivel den boso bida y nos apoyo boso lo tin sigur’, Minister di Labor, Energia y Integracion, Glenbert Croes a expresa.

Gobierno ta sumamente orguyoso di e hobennan cu a gradua di klas 16 di SVT y ta gradici Comandante Tim Van Wijk di Mariniers Kazerna Savaneta pa nan sosten cu Formacion Social, bao guia di Jessica Ras y su team, pero tambe Lieutenant Vrolijk y Comandante Kelly di Arumil pa nan trabao.