Gobierno ta reserva 4 miyon florin pa renobacion di Cas di Cultura

E renobacion di Cas di Cultura ta balora na 17 miyon florin pa cual Gobierno di Aruba a reserva 4 miyon florin. Pa mas di 65 aña Cas di Cultura ta brindando espacio pa diferente forma di ex-presion di arte y cultura na nos Pais.

Aparte di e renobacion di e parti monumental di Cas di Cultura, den cual lo drecha e escenario y ekipa esaki cu e tecnologia moderno necesario, luznan adecua y stoelnan confortabel, lo amplia e edificio cu un brasa cada banda pa asina extende e capacidad y amplia e posibilidadnan pa por expresa y admira arte y cultura optimalmente.

Ta urgi tur instancia y persona cu ta stima Aruba su cultura, pa brasa e proyecto importante aki cu un aporte financiero, pa asina sigura cu Cas di Cultura por yega na e fondonan necesario pa e renobacion grandi aki.