Gobierno ta felicita mr. Jurima Bryson como e prome ombudsman pa Aruba
ORANJESTAD - Prome Minister Evelyn Wever-Croes, den nomber di Gobierno, ta felicita e prome Ombudsman / Defensor di pueblo cu recientemente a keda nombra, mr. Jurima Bryson.
Tabata na aña 2004/2005, cu a cuminsa cu e iniciativa pa introduci un Ombudsman pa defende pueblo di Aruba. Na 2010, a entrega un concepto di ley nobo basa riba esun entrega na 2004/2005 y recientemente a haci algun adaptacion riba e concepto di ley pa Parlamento por trata.
E buskeda y seleccion di e candidato(a) pa e posicion di Ombudsman tabata na encargo di un comision cu a consisti di Corte di Husticia, Controleria General y di Raad van Advies. E comision independiente na final di e trayecto a entrega tres nomber na Parlamento. Parlamento, despues di a trata esaki, a vota na fabor di mr. Jurima Bryson como e prome Ombudsman.
Pa october tur procedura lo ta finalisa, e huramentacion lo tuma luga y oficialmemente, Aruba lo tin su prome Ombudsman. Mientrastanto, preparacionnan y organisacion pa e oficina di Ombudsman ta andando cual gastonan ta cay bou di presupuesto di Ministerio di Asunto General.
Prome Minister ta gradici e kwartiermaker, sra. Sahaira Kelly cu a yuda setup e organisacion pa Ombudsman di Aruba.
