A presenta e “concept sociaal plan” pa asina independisa e unidad di Dienst Warenkeuring en Hygiene (DWH) cu actualmente ta resorta bou di Departamento di Salud Publico (DVG).

Dienst Warenkeuring en Hygiene (DWH) lo independisa pa medio di un sui generis cu ta Aruba Quality & Hospitality Authority (AQHA). Lo traspasa e tareanan di DWH na AQHA y e entidad aki lo ta responsabel pa e permisonan di vacation rentals, hotels, y tambe procesa e aplicacion di restaurant y barnan pa asina cumpli cu e rekisitonan di higiena y tarifanan di e permiso. Cu esaki lo crea un “level playing field” y tambe genera entrada pa gobierno.

E reunion aki ta duna e oportunidad pa e representantenan di sindicato por duna nan aporte. Despues di e presentacion aki, e sindicatonan lo bay reuni cu nan miembronan pa asina bin bek cu nan reaccion. E concepto ta pa e unidad di DWH aki bira un sui generis y lo encarga su mes cu henter e proceso di dunamento di permiso na vacation rentals. E entidad aki lo funciona riba su mes di un manera mas eficiente y efectivo. E obhetivo ta pa e mantene un nivel di eficiencia, conformidad, sigura e calidad y mas importante pa e ta un proceso mas transparente.

Dentro di cuatro siman lo duna mas informacion encuanto e desaroyo di e “concepto sociaal plan” pendiente pa ricibi tur comentario y reaccion di e miembronan di e sindicatonan pa asina por continua cu e proceso y formalisa e sui generis di AQHA.