Embahador sr. Andre Haspels y su casa sra. Bernie Haspels-Grootenboer a organisa e bunita recepcion di despedida aki. Pa e ocasion aki Minister di Finansa y Cultura Xiomara Maduro a representa Gobierno di Aruba. Gobierno di Aruba ta gradici sra. Joselin Croes pa representa Aruba dignamente na Washington DC desde aña 2018 pa 2023.

Desde  2018, Sra. Croes a logra hechonan remarcabel, semper poniendo Aruba riba mapa na Washington. 

Riba e tereno di Educacion, Sra. Joselin Croes a logra un cantidad di acuerdonan (MoU’s) pa nos studiantenan por atende varios instituto educativo na Merca. Tambe e studiantenan di Aruba a haya e beneficio igual na studiantenan Americano di por paga ‘in-state tuition’ enbes di tarifanan internacional. Esaki a haci studiamento pa hopi di nos studiantenan di Aruba un soño alcansabel. Tambe danki na su esfuerso Pais Aruba ta riba e lista di ‘Latin American and Caribbean Scholarship’ na estado di Florida. Un logro grandi considerando cu studia na Merca ta hopi costoso.

Sra. Croes a hunga un papel importante tambe den e evaluacion di Trafico di Persona. Danki na  su gran esfuerso, Aruba a ricibi un evaluacion positivo y a ‘upgrade’ nos nivel, lo cual ta refleha nos compromiso pa cumpli cu exigencianan internacional.

Tambe sra. Croes tabata tin bon contactonan cu Sra. Croes cu IMF y Banco Mundial. Su asistencia pa organisa e reunionnan tabata di sumo balor pa e exito di Aruba. Ademas den e area diplomatico, Sra. Joselin Croes a asisti Prome Minister Evelyn Wever-Croes na e Asamblea General di Nacionnan Uni.