Gobernador Boekhoudt a guia caminata den naturalesa pa “Buki di Pret”
ORANJESTAD - E aña aki ta e di tres biaha cu ta publica “Buki di Pret” na Aruba; un buki cu diferente actividad cu muchanan por inscribi p’e den vakantie grandi.
Pa motibo di gran interes di aña pasa Gabinete di Gobernador a organisa un caminata den naturalesa atrobe, na cual 18 mucha a participa. E biaha aki e caminata a tuma luga den Parke Nacional Arikok. E muchanan a reuni for di mainta trempan na e Visitors Center y a transporta nan pa e Cunucu Arikok Trail cu e trucknan di Korps Mariniers. Via e ruta di e caminata aki e grupo a cana den direccion di e cas di torto blanco, tambe conoci como Cunucu Arikok.
Durante e excursion Gobernador Boekhoudt a duna informacion di e palonan y e matanan cu tin banda di e ruta. Na Cunucu Arikok tabata tin un momento pa descansa y e muchanan a haya algo di bebe pa refresca.
Despues e caminata a sigui den direccion di e pinturanan di indjan, na unda e Gobernador a duna splicacion di e pinturanan.
Na e final parti di e ruta a hiba e muchanan cu e trucknan na e “green house” na unda un Park Ranger a duna informacion cual palonan y matanan ta cultiva eyden y ta haci esaki. Tabata un mainta informativo y pret cu muchanan hopi entusiasma!
Potretnan: © Kabinet Gouverneur Aruba