Meta di e proyecto ta pa yuda debolbe e degeneracion ambiental y perdida di biodiversidad pa un ambiente maritimo mas saludabel y resiliente pa Aruba.

A acerca Departamento di Salud Publico cu e peticion pa no fumiga mas den mangroven, debi na e hecho cu e pesticida cu Gele Koorts Muskietenbestrijding (GKMB) ta uza pa fumiga sangura den e diferente mangroven rond Aruba no solamente ta mata e sangura sangura preto di mangel (Aedes taeniorhynchus) pero tambe otro especie y insecto cu ta biba den e mangroven y ta causa daño tambe na e mangroven.

Pa GKMB ta conoci cu entre september y december, e areanan entre otro di Mangel Halto, Santo Largo, Savaneta y Noord sa tin molester di e sangura preto di mangel.

E sangura no ta representa un peliger pa salud di e bario pero debi na e molester cu nan por ocasiona, GKMB tawata fumiga pa yuda alivia e molester. Debi na e proyecto "Turning the Tide" ta importante pa informa comunidad y particularmente e areanan cu normalmente tin molester di e sangura di mangel cu GKMB lo no por bay fuminga mas. Pa segura cu habitantenan no tin mucho molester, GKMB den colaboracion cu Fundacion Parke Nacional Aruba (FPNA) lo bay traha pa resolve e molester di sangura aki door di coba canal den e mangroven pa e awa di lama por circula. Ta importante pa compronde cu ora awa di lama ta circula den e mangelnan, e ecosystema di mangelnan ta saludabel y asina aki no tin molester di sangura. Dus e trabou primordial di FPNA ta pa segura cu e mangelnan den areanan protegi bou maneho di FPNA ta saludabel pa asina no tin molester. Di e forma aki lo trata na combati e molester di sangura di mangel pa e barionan, hacienda uzo di metodo mas natural y saludabel pa medio ambiente.

DVG y FPNA ta pidi disculpa si den cuadro di e proyecto di restauracion di nos ambiente maritimo, e areanan cerca di mangroven por sinti molester di sangura.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama 5224200 of manda mail na servicio@dvg.aw.