General

Desaroyo Teritorial di Aruba 2019 (ROP 2019) 

Riba 15 di januari 2019 a publica un concepto pa un Plan pa Desaroyo Teritorial di Aruba nobo. Te cu 15 di maart 2019 a brinda oportunidad pa entrega punto di bista (zienswijze). E concepto a wordo ahusta y contestacion riba tur punto di bista cu a entrega a keda incorpora den e Nota riba Punto di Bista (Nota Zienswijzen). Por medio di Decreto Nacional no. 1 di 17 di juli 2019 e Plan pa Desaroyo Teritorial di Aruba 2019 (ROP 2019) a keda ratifica.

Por download y tambe tuma nota di forma digital di e ROP 2019, e mapa, e Decreto Nacional no. 1 di 17 di juli 2019, e splicacion riba ROP 2019, e Nota riba Punto di Bista y un mapa di structura ecologico principal:

Por tuma nota di ROP 2019 na oficina di Departmento di Infrastructura y Planificacion (DIP) tambe. 

Siguientemente por haya informacion relaciona cu e prome ROP (bieu).

Durante e prome 400 aña di dominio colonial apenas Aruba a crece den poblacion; na aña 1804 tabatin 1155 habitante. Nan tabata biba principalmente di criamento di cabay y cabrito. Esaki ta e motibo cu Paardenbaai na Playa a haya su nomber. Den siglo 19 a cuminsa cu desaroyo di cultivo di aloe y a cuminsa cu poco mineria di oro y fosfaat. Aruba a crece te cu 9702 habitante na 1900.
E prome crecemento rapido di poblacion a cuminsa desde 1929 ora cu industria di petroleo (refineria LAGO) a establece na San Nicolas y banda di1950 Aruba tabatin 53.000 habitante.  

Ya a prome cu ceramento di LAGO na 1985, turismo den e di dos mitar di siglo pasa a bira e pilar nobo di e crecemento economico. Desde nos autonomia na 1986 turismo ta percura pa mas crecemento acelera; mientras tanto desde 2005 mas di 100.000 habitante ta biba na Aruba. Un pueblo agrario poco habita den un siglo di tempo a cambia pa un sociedad moderno soprepobla cu un nivel di prosperidad relativamente halto.

Door cu e poblacion y turismo a crece, a bira mas druk y uzo di espacio tambe ta aumenta. Tereno pa desaroya ta limita y e recursonan natural ta bou di un presion enorme. Conflicto entre biba, haci deporte, haci negoshi, recrea, traha y fiesta ta bira mas fuerte. Mas hende ta nifica mas cas, negoshi, auto y caminda, door di cual e chens pa molester ta bira mas hopi. Fila largo, desorden, holo stinki y molester di awa ta e problemanan cu ta sigui crece.

Cu crecemento continuo di e economia y e poblacion e necesidad pa coregi ta bira mas grandi. Gran parti di e pais ya caba ta urbanisa y ta solamente un parti masha chikito mes di area rural ainda ta refleha e Aruba trankil di antes.

E crecemento, segun demanda, a sigui e ruta di mas facil riba e isla, for di cual a surgi un uzo di espacio den un forma hopi plama, pa no bisa desordena.

Na 2006 e Ordenansa di Desaroyo Teritorial a bira un ley oficial pa asina por guia e proceso di uzo di tereno y espacio miho. LRO ta brinda e posibilidad pa formula un plan di Desaroyo Teritorial (ROP): un plan di maneho den cual gobierno ta fiha e desaroyo mas desea pa e siguiente diez añanan. Na final di 2008 a termina cu e prome ROP di Aruba. Y na mei 2009 el a keda stipula.