TCTP ta un organisacion cu na 2019 a transforma den un fundacion y ta conta cu fondo di “Erasmus+” y “European Solidarity Corps”. Nan meta ta pa brinda apoyo na varios organisacion local pero tambe na e hubentud pa yega nan maximo potencial, door di brinda diferente tipo di workshop den cuadro di inclusion social manera arte, deporte y social-cultural.

Desde aña 2019, TCTP ta brindando actividad di arte, deporte y social cultural na KIA, specificamente pa e dama y hobennan, sinembargo esaki a stop pa motibo di pandemia di COVID, pero na october 2022 a reanuda e programa. TCTP ta trahando cu varios fundacion y organisacion local pa asina brinda lesnan di futbol, volleyball, baile y arte na hobennan y damanan cu ta deteni na KIA.

Mientrastanto a expande e programa y lo cuminsa duna workshops di musica tambe. TCTP ta traha cu seis boluntario profesional di entre otro Popcorn Club, Arte Sano y YMCA pa menciona algun, y ta trahando na KIA 4 biaha pa siman.

Ademas, TCTP a logra obtene fondo adicional di “Samenwerkende Fondsen Cariben”, cu cual ta conta cu mas recurso pa continuacion di e programanan di arte, baile, y musica.

Segun gobierno, e proyecto aki ta sumamente positivo, pa cual motibo a reuni cu TCTP pa sondea e posibilidad pa expande e proyecto aki pa futuro y garantisa continuidad di e proyecto aki na e bienestar di esnan deteni na KIA. Pronto lo firma un convenio cu TCTP pa formalisa e colaboracion aki.