Fundacion Lotto pa Deporte (Lotto)

Historia di Fundacion Lotto pa Deporte

Fundacion Lotto pa Deporte a ser funda na 1982 cu e meta pa haya fondo pa deporte, educacion fisico y cultura. A dura sin embargo dos aña prome cu e fundacion por a cuminsa opera. Te na 1984 e fundacion a cuminsa cu benta di un producto di Lotto cu a haya e nomber “Lotto pa Deporte”. Den añanan 90 a añadi un di dos producto, asina yama raspaito. Na 1996 e Fundacion a haya un director nobo cu  tabata tin como trabou principal pa automatisa e bendemento di Lotto. Prome tabata haci tur cos manualmente. Despues di negocia pa varios aña, a introduci e sistema on-line den luna di october di 1996. Durante di e añanan a introduci e productonan Catochi, Wega di number Korsou, Big 4, Lotto di Dia, Mini mega (Mega Plus), Lotto 5, Zodiac, Raspa y Facilito. Awendia e Fundacion ta bende nuebe producto. Den futuro e fundacion tambe lo introduci un producto di Bingo on-line pa e poblacion local. E fundacion cu a cuminsa cu 50 punto di benta awendia tin 195 punto di benta.

E organisacion

Fundacion Lotto pa Deporte ta un fundacion cu ta resorta bou di e Ministerio di Salud Publico y Deporte. E fundacion tin un directiva apunta door di Gobierno. E directiva ta supervisa e implementacion di e maneho di e fundacion y e director ta ehecuta e maneho.

E constelacion

Fundacion Lotto pa Deporte tin un oficina cu ta traha bou di responsabilidad di un directiva nombra pa ministro di Salud Publico y Deporte y pa ministro di Finanzas.

E meta di e fundacion

E meta di e Ley di Loteria Arubano ta pa duna apoyo financiero na deporte, practicanan fisico y cultura. Pa por realisa un otorgamento balancea di e fondonan na e organisacionnan deportivo, e Minister a asigna un Sport Subsidie Commissie (Comision di Subsidio pa Deporte) cu ta encarga pa inventarisa y controla tur subsidio pa deporte.

Subsidio

Desde october 1996 te cu december 2006 e fundacion a entrega mas cu 125 miyon na premio y mas cu 25 miyon a ser poni disponibel pa deporte y cultura. E fundacion a haci inversion grandi den proyectonan importante pa e pueblo di Aruba, principalmente e Parke Curason Jaburibari, Centro Deportivo Frans Figaroa, Stadion Guillermo Prospero Trinidad, Centro di Bario Jara, Centro di Bario Simeon Antonio pa no papia mes di tur e competencianan deportivo y materialnan deportivo.