Fundacion ABO y Departamento di Salud ta uni forsa pa fortalece cuido preventivo di cancer na Aruba

Nanine Ponson, Directora di ABO a duna di conoce cu esaki ta un colaboracion importante den e maneho di salud di e poblacion den forma strategico y calcula.

E laso entre ABO y DVG no ta nobo. ABO a nace for di Stichting BOB Aruba y di DVG na 2012. Hunto cu otro stakeholders e tempo ey, AZV y Hospital, Stichting BOB Aruba a bira e iniciado na Aruba di e deteccion tempran di malesa cronico, esta cancer di pecho. Durante 12 aña, Stichting BOB a fungi como e organisacion central pa amplia e programanan di deteccion tempran di cancer di pecho. Awo cu fundacion ABO, ta bay cuminsa cu screening di cancer di tripa y screening di cancer di boca di matriz.

Fundacion ABO a nace na october 2024 y e programanan BOCA y CORESA a haya nan inicio. Cu casi 10 aña di e programa di BOB, no tin duda cu CORESA y ABO lo bay tin na balor agrega riba nivel individual mescos cu BOB. Ademas di prevencion, kier sa tambe si e resultado ta representativo pa e comunidad segun e edadnan cu a scoge pa e screening. Mayoria caso di cancer ta presenta entre 45 cu 75 aña y mescos cu e programa di CORESA, BOCA ta entre 24 aña y 65 aña. Ta importante pa sa ki tipo di cancer, ki tipo di tumor ta presenta y con e programa ta afecta e mortalidad di e poblacion.

Esaki ta e tipo di preguntanan epidemiologico cu lo haya contesta cu e colaboracion entre Fundacion ABO y DVG. Hunto cu e informacion cu ta haya for di Hospital, por ehempel riba e tipo di cancernan cu ta detecta, ta spera di por yega na e datonan desea.

E datonan cu ta colecta ta cu consentimento explicito di tur participante. Ta procesa esaki den forma anonimo pa asina DVG por funciona den su rol supervisor. ABO tambe ta mantene na e reglanan di privacidad di cada participante.

Awendia ABO ta duna servicio di screening di cancer di pecho, boca di matriz y tripa grandi.