Fast Ferry ta brinda oportunidad economico pa Aruba y Corsou

Na mei 2023, minister di Asunto Economico, Comunicacion y Desaroyo Sostenibel, Geoffrey Wever conhuntamente cu minister di Desaroyo Economico di Corsou, Ruisandro Cijntje a firma un Memorandum of Understanding (MoU) pa colaboracion riba tereno economico entre Aruba y Corsou.

Durante e aña, tabata tin diferente ocasion caminda a inicia colaboracion pa logra metanan comun, entre otro riba tereno di comercio husto (Fair Trade) y mas. 
Recientemente, diferente partido comercial a mustra interes den inicia un conexion di ferry, den un prome instancia entre Aruba y Corsou, y den un siguiente fase cu Boneiro. Debi na e interes renoba, Conseho di Minister di Aruba a acorda na juni 2023 pa instala un Comision di Conexion di Ferry cu su tarea pa duna conseho riba e condicionnan necesario pa un conexion di ferry entre Aruba y Corsou.

Basa riba e FOICE-rapport, e comision a constata cu un ferry pa pasahero ta simplifica e condicionnan publico necesario considerablemente compara cu un ferry cu transporta tanto pasahero como carga.

Conseho di Minister di Aruba a aproba e avance di e proyecto aki, y riba 16 di augustus 2024 cu Minister Geoffrey Wever a reuni cu Minister Ruisandro Cijntje, a acorda cu Aruba y Corsou lo traha hunto pa cuminsa cu e parti di implementacion di esaki.

Recientemente a incorpora Fast Ferry tambe como un proyecto den e Landspakket, den e cuadro pa avansa comercio den e region di Caribe Hulandes. Cu esaki Hulanda lo brinda asistencia tecnico pa e implementacion. E proyecto aki lo ta e prome proyecto cu lo implementa entre e dos islanan den cuadro di Landspakket.