FADA a presenta resultado di estudio riba “vaping” na Aruba

FADA ta un organisacion no-gubernamental cu ta existi pa 40 aña caba cu e meta di informa y conscientisa pueblo di Aruba y e hobennan tocante e problemanan cu uzo y abuso di droga y alcohol ta trece cu ne.

Durante e mainta aki representantenan di FADA a trece dilanti nan preocupacion pa cu vaping na Aruba. Esaki awendia ta un “trend” entre adultonan y hobennan pero mas preocupante ta cu edad entre e hobennan ta hopi jong, cuminsando na 7 aña. Na Aruba hopi hende no conoce e riesgonan di salud cu ta bin cu vaping y esaki ta e enfoke y e meta di FADA, pa conscientisa e comumindad.

Vaping ta un alternativa moderno pa uzo di sigaria, y ta parce mas “sigur” debi cu e no ta saca huma manera sigaria. Ademas tin opcion pa cambia e sabor di e vaping door di uza diferente aroma y sabor pa nan vape. Esakinan ta crea e percepcion cu vaping ta menos dañino cu sigaria cual no ta cuadra cu berdad. Vaping ta ocasiona problemanan di pulmon principalmente, pero tambe otro problemanan grave di salud. Muchanan cu ta haci vaping ta mas vulnerabel na e daño di vaping, mirando cu nan pulmonnan no ta suficiente desaroya ni fuerte.

FADA ta crea campañanan di conscientisacion, pero na final di dia ta e mayornan tin e responsabilidad pa educa nan yiunan, specialmente esnan menor di edad, riba e peligernan di vaping, uzo di sigaria, droga y alcohol.