Exposicion KINANIK
ORANJESTAD - Biblioteca Nacional Aruba (BNA) ta presenta un exposicion yama KINANIK di artista Steve Francees. E exposicion aki ta consisti di 14 arte di pintura, crea na Hulanda, Boneiro y Aruba. KINANIK ta habri pa publico di 7 di februari pa 21 di februari den e sala di exposicion di BNA Oranjestad. E apertura oficial ta diahuebs dia 6 di februari di 6pm pa 8:30pm.
Steve Francees ta sali di un famia artistico y for di chikito tabata rond di pintamento, arte di musica y fascina cu historia di indjan. Na edad di 5 aña Steve su tata a hib’e su prome museo cu tabata Escorial na Madrid unda nan tabata biba algun tempo. Na edad di 15 aña Steve a tuma les di teater y improvisacion, a bay scol di musica te cu 17 aña di edad cu tabata den guitara y despues piano.
Steve a studia Marketing y por a aplica hopi di su idea y diseñonan den accion durante hopi aña den comercio y tambe trahando den bario como boluntario pa hopi aña caba cu mucha. Su amor pa arte nunca a para y tambe gusta Fotografia y ultimo añanan a bay bek den pintura y Mixedmedia.
Na aña 2013 Steve ta gradua na Israel den pictograph, Paleo(proto) Hebreu y Hebreu Biblico pero su amor pa historia di Aruba semper a fascin'e masha hopi mes.
Den e exposicion KINANIK lo bay tin pintura di Aruba di rond 3000 aña pasa, escultura arcaico, artefactonan y comunicacion entre tera firme y nos islanan entre indjannan. Aruba su desaroyo comercial durante e epoca Spaño den 1600, Oranjestad den 1800-1900 y personahenan interesante. Historia ta keda central den e exposicion aki y sigur lo ta hopi interesante pa tur persona interesa den arte y tambe studiantenan. Tambe lo tin un seccion di e Goldrush cu Aruba a conoce y su historia, mapanan y storianan oral no conoci ainda pa hopi hende.
