Evaluacion di diploma
Kico ta un diploma?
- Un diploma ta un prueba por escrito cu un persona a cumpli cu tur exigencia di un programa di estudio cu ta regla segun ley y cu e persona ta domina cierto materia den teoria y practica;
- Ta papia di un diploma, si un persona a caba cu exito un programa di estudio regla segun ley, manera MAVO, HAVO, VWO, MBO, HBO of Universidad.
Kico ta un certificado?
- Un certificado ta un prueba cu ta indica cu un persona a cumpli cu exigencia di un curso teoretico of practico cu den mayoria caso no ta regla segun ley;
- Un certificado ta indica cu un persona tin conocemento teoretico of practico di cierto material specifico;
- Un cursista ta haya un certificado ora di sigui y termina un curso manera middle management, waiter, bartender, carpinte, welder y curso di computer;
- Generalmente, e cursonan aki no ta forma parti di e estudionan regla segun ley y e certificadonan no ta iguala e diplomanan di e estudionan regla pa ley manera MAVO, HAVO, VWO, MBO, HBO of Universidad.
Kico evaluacion di diploma ta encera?
Evaluacion di diploma ta encera comparacion di e diploma/estudio cu mester evalua, cu ta cay pafor di enseñansa regular na Aruba cu un diploma/estudio relevante na Aruba cu ta cay den enseñansa regular of si ta necesario cu un diploma/estudio relevante Hulandes.
Pakico un evaluacion?
- Pa dicidi si e persona concerni (di kende e diploma/estudio ta ser evalua) ta wordo admiti na enseñansa regular superior na Aruba;
- Pa posibel dispensacion di materia pa e persona concerni ora di admision na un estudio superior;
- Como sosten ora di fiha e cualificacion pa duna enseñansa di e persona concerni;
- Pa posibel nombramento di e persona concerni den un funcion;
- Pa hinca of ahusta e persona den un rangenstelsel.
Kende por entrega un peticion pa evaluacion di diploma?
- Minister (of su representantenan);
- Hefe di un departamento gubernamental (of su representante);
- Hefe di un compania den sector priva of organisacion (of su representante);
- Coordinador di admision di un instituto di enseñansa pa loke ta toca posibel admision di e persona concerni na un estudio di e instuticion;
- Aceptacion di peticion di otro instancia/ persona ta keda na huicio di Director di Departamento di Enseñansa.
Con mester entrega un peticion pa evaluacion di diploma?
- E peticion mester ta por escrito y dirigi na director di Departamento di Enseñansa;
- Describi e meta di e peticion bon, entre otro:
- Pa determina e nivel di e estudio sigui cu e meta pa por admiti e persona concerni na e estudio/facultad desea;
- Pa determina e nivel di e estudio sigui cu e meta pa hinca e persona concerni den un schaal di salario;
- Pa determina e nivel di tur estudio sigui pa e persona concerni of evaluacion di un estudio specifico;
- Pa compara un estudio di exterior cu un estudio specifico di Aruba of Hulanda.
- Pone bon cla kende ta e persona concerni y con por haya contacto cun’e (pues: nomber completo, adres y telefon);
- Documento cu mester ta entrega hunto cu e peticion: copia di diploma, curriculum vitae y copia di lista di cifra.
Kico mester entrega ora di evaluacion di diploma?
- Diploma original y/of certificado pa controla;
- Lista original di cifra pa controla (lo por pidi e persona concerni pa e pidi e institucion unda cu el a studia, pa nan manda e lista di cifra directamente pa Departamento di Enseñansa, seccion Evaluacion di Diploma);
- E contenido di e programa di estudio;
- Identificacion oficial pa controla;
- Traduccion di e diplomanan original y lista di cifra pa un traductor huramenta, si e diploma of e lista no ta na Hulandes, Ingles of Spaño.
E persona cu ta encarga cu evaluacion di diploma lo haci un cita cu e persona concerni pa bin mustra e documentonan menciona.
Kico ta pasa si no entrega tur documento?
Dependiendo di e tipo di documento cu falta, lo por dicidi pa no trata e file (caso) of por haci un evaluacion temporal cu ta valido pa un tempo cortico. Despues cu e termino a caduca, ta declara e evaluacion como invalido. Lo bin cu un evaluacion oficial despues cu e persona concerni a entrega tur documento.
Pa mas informacion por tuma contacto cu Departameno di Enseñansa cu e seccion di Evaluacion di Diploma.