ESTA
Entrante 12 di januari 2009 Department of Homeland Security, DHS, a introduci un programa nobo cu tin como meta pa haci biahamento pa Merca mas sigur. Esaki ta nifica cu tur hende cu ta biaha pa Merca sea pa placer of pa haci negoshi mester pidi adelanta permiso pa drenta Merca via e programa online cu yama Electronic System for Travel Authorization, ESTA. E personanan cu tin un visa pa biaha pa Merca no ta obliga pa haci uzo di ESTA tanten cu e visa ta valido y cu ta uza e visa pa e proposito cu otorg’e. Bo por registra via e website: https:// esta.cbp.dhs.gov/esta/. Pa esnan cu no ta domina e idioma di Ingles, tin mas idioma riba e website disponibel pa yuda e usuario compronde e preguntanan. Paga tino si cu e contestanan mester ta na Ingles. Si acaso cu bo no tin acceso na internet, un otro persona (ruman, agencia di biahe, amigo etc) por yena e formulario pa bo.
E informacion cu mester yena riba e formulario di e website ta e.o. bo nomber, fecha di nacemento, number di paspoort y otro informacion relaciona cu bo biahe.
Por haci e peticion cualkier momento prome cu bo biaha. Sinembargo ta consehabel pa hasi esaki mas pronto cu ta posibel. Den mayoria caso e biahero ta haya contesta den un par di seconde:
- Authorization Approved: bo mag di biahe pa Merca;
- Travel Not Authorized: bo mester aplica pa un visa via embahada of consulado Mericano prome cu bo por biaha. Pa mas informacion e sistema lo referi bo na e website www.travel.state.gov
- Authorization Pending: dentro di 72 ora e biahero lo haya un contesta via e website di ESTA, si e lo haya autorisacion pa biaha pa Merca of no.
Un peticion cu ta aproba, basta cu nan no a hal’e aden, ta valido pa un periodo di maximalmente dos aña of te ora cu e paspoort di e biahero caduca. Tuma nota cu e aprobacion via ESTA no ta un garantia pa por drenta Merca, e aprobacion di ESTA ta duna unicamente e permiso pa subi abordo di un avion of barco cu ta biaha pa Merca.
E reglanan di Inmigracion Mericano ta aplicabel na yegada na Merca.